Projetu Uma Naroman ba Povu iha Nunutana Raifun atraza
BOBONARO, 30 novembru 2023 (TATOLI) – Benefisiáriu sira preukupa ho implementasaun projetu Uma Naroman ba Povu (UNP) faze daruak tinan 2022 nian hamutuk unidade haat iha aldeia Nunutana, suku Raifun, postu administrativu Maliana, munisípiu Bobonaro tanba atraza.
Emílio Resi Leto nu’udar benefisiáriu informa, kontrusaun ne’e la’o kuaze tinan ida-resin ona, maibé progresu fíziku foin to’o iha faze taka kakuluk no reboka.
“Ne’e tanba materiál mai fallansu, halo badaen sira la mai servisu, depois ekipa sira mós la mai haree servisu ne’e atu di’ak ka aat, dalaruma fulan-ida mak sira mai dala-ida, ne’ebé ami ezije ba governu tau-matan nune’e bele hela ona,” benefisiáriu ne’e ko’alia iha Raifun, kinta ne’e.
Flaviano Loe Mau ‘Asu Fuik’ nu’udar abitante lokál, haktuir, iha fulan hirak ba kotuk, fornesedór la konsege mobiliza materiál fabrikadu no lokál ba to’o fatin projetu tanba udan no kondisaun estrada ladi’ak nakonu ho tahu.
Tuir veteranu ne’e katak, situasaun ne’e normál tanba klima, maibé nia lamenta tanba tempu bailoro estrada di’ak hela mós materiál la mai nafatin.
“Foin horbainhira mak hatún rai-henek rét ida, dehan aban mak hatún rét rua tán, depois ha’u husu ba badaen dehan sumente mós laiha, ami hakarak husu de’it, tanba saida mak atrazu ida hansan ne’e, nusá mak materiál mai kotu-kotu ida hanesan ne’e, badaen mós hein sai dúvida, tanba saida mak materiál ne’e fulan ida ka rua mai dala-ida de’it,” veteran ne’e preokupa.
Xefe aldeia Nunutana, Januário Borges Perreira, husu ba ekipa tékniku PNDS atu kontrola beibeik atubele aselera projetu refere tanba udan hahú monu rai ona.
“Sira dala ruma fulan-ida kontrola dala-ida, ida-ne’e projetu ne’e la la’o, badaen mós la servisu tanba osan laiha, agora governu ka sé mak tenke lori osan mai selu badaen atu servisu, hodi bele halo hotu lalais, nune’e uma na’in bele hela ona,” nia hateten.
Tuir Observasaun Agência Tatoli iha terrenu nota katak, benefisiáriu balu sei hela iha uma tuan no balu iha uma provizóriu.
Notísia relevante: Uma-kain besik 40 iha Nunutana asesu ona enérjia elétrika
Jornalista : Sérgio da Cruz
Editór : Evaristo Soares Martins
