BOBONARO, 30 novembru 2023 (TATOLI) – Abitante uma-na’in besik 40 iha aldeia Nunutana, suku Raifun, postu administrativu Maliana, munisípiu Bobonaro, asesu ona enérjia elétrika.
Falviano Leo Mau kodigu ‘Asu Fuik’ nu’udar abitante aldeia Nunutana, sente konte no agradese ba governu tanba durante tinan 20-resin hela de’it iha nakukun no foin iha loron 17 fulan-outubru 2023 ne’e mak hetan naroman.
Notísia relevante: EDTL halakan ahi ba suku Raiheu no Atudara
“Sira ida mate ne’e liu ona, ami ida moris ne’e sei hetan listrik, nabilan, tanba agora komesa ahi lakan daudaun ona. Ami la nakukun ona, ida-ne’e di’ak tebes, tanba loron ami-nia oan sira loron ba Eskola, mestri sira hanorin, kalan sira bele estuda matéria ne’ebé mestri fó ne’e, ami orgulu ho ida ne’e, goza ne’e la’ós mai ami (ferik-katuas) maibé ba ami-nia oan no bei-oan sira” nia ko’alia iha Bobonaro, kinta ne’e.
Xefe aldeia Nunutana Foun, Januário Borges Perreira, reforsa, fulan rua ona abitante sira sente tanba asesu ona enérjia elétrika.
“Tinan 22 povu uza tenaga surya, sente terus loos, agora tama ona povu sente kontente, fulan rua ona ahi lakan ne’e, televizaun, kulkas mak sei laiha, maibé bele asesu rádiu, ahi lakan ona ne’e neineik sira mós bele iha televizaun, sasán eletróniku,” nia katak.
Xefe aldeia ne’e akresenta, komunidade sira mós kontente tanba asesu ona bee-moos ho di’ak no estrada moos di’ak natoon ona.
Maibe xefe aldeia Januário nafatin ezije ba governu atu kontinua tau-matan ba estrada ligasaun hosi aldeia ne’e ba to’o área Halimesak hodi fasilita movimentu komunidade no transporte.
“Udan hanesan ne’e bee tún estrada sira-ne’e aat hotu, tanba saluran laiha. Ida-ne’e difikulta tebes komunidade lori produtu lokál ba merkadu,” nia hateten.
Enkuantu aldeia Nunutana iha postu Saúde no Ensinu Báziku Filiál (EBF) ida, no aldeia ne’e mós iha poténsia ba ortikultura, hansan modo, alfase, modo-mutin, liis, ai-manas no produtu lokál sira hanesan batar, fehuk no talas.
Notisia relevante: Projetu UNP faze daruak iha aldeia Nunutana atraza
Jornalista: Sérgio da Cruz
Editór: Evaristo Soares Martins
