Projetu UNP faze daruak iha aldeia Nunutana atraza
MALIANA, 30 juñu 2023 (TATOLI)-Projetu Konstrusaun Uma Naroman ba Povu (UNP) faze daruak tinan 2022 iha Aldeia Nunutanan, suku Raifun, postu administrativu Maliana, munisípiu Bobonaro, dezde fulan-abríl ne’e 2023 atraza.
Xefe aldeia Nunutanan, Calisto Santo, haktuir projetu ne’e hahú implementa iha fulan-dezembru tinan 2022 no agora uma unidade haat ne’e, ida foin iha faze monta kakuluk no tolu seluk taka kalen no laran reboka hotu ona.
Notísia relevante: UNP faze daruak iha Ritabou taka ona kalen
“Agora dapur ho sintina seidauk halo, materiál la sa’e mai tanba ita-nia dalan kotu, sira-nia razaun mak ida-ne’e, tanba ne’e ami husu ba PNDS atu lori sasán mai atubele halo hotu uma ne’e,” nia informa ba jornalista sira iha Maliana.
Hatán ba preokupasaun ne’e, Diretór Programa Nasionál Dezenvolvimentu Suku, Munisípiu Bobonaro, Paulino Viegas Tilman, konfirma ekipa tékniku postu, munisípiu no ekipa Jestaun Suku (EJP) sira durante kontinua halo monitorizasaun ba obra hirak-ne’e.
Maibé sira identifika atrazu tanba kestaun klima difikulta fornesedór sira atu distribui materiál fábrika, liuliu materiál lokál hanesan rai-henek.
“Ita orienta sira dala ruma sempre atrazu tempu, dehan hein lai, hein lai, kuaze suku hotu-hotu nunka respeitu on-time ne’e. Ida-ne’e mak difikulta ita hakarak aselera, ita hakarak povu hela lalais nia uma,” nia dehan sesta ne’e.
Nia husu ba Ekipa Implementasaun Programa (EIP) iha aldeia Nunutanan no suku 59 atu ativu servisu tuir kalendáriu no komisaun ne’ebé iha nune’e bele aselera projetu refere.
“Ita mós presiza apoia malu ho ekipa suku sira atu nune’e, uma ne’ebé mak halo ba ita-bot sira,numa ne’ebé mak kualidade,bdignu ba ita-boot sira uza karik ba mós uza ho kontente,” nia apela.
Tuir dadus hosi PNDS VIII Governu Konstituisionál konsege konstrui ona UNP hamutuk unidade 459 iha munisípiu Bobonaro.
Notisia relevante: Suku 13 iha Bobonaro seidauk implementa UNP regulár 2022
Jornalista: Sérgio da Cruz
Editór: Evaristo Soares Martins
