iklan

EKONOMIA, BOBONARO, HEADLINE, MUNISÍPIU

UNP faze daruak iha Ritabou taka ona kalen

UNP faze daruak iha Ritabou taka ona kalen

Xefe suku Ritabou, Maximiano de Araújo. Imajen Tatoli/Sérgio da Cruz.

BOBONARO, 21 marsu 2023 (TATOLI) – Implementasaun projetu Uma Naroman ba Povu (UNP) regulár faze daruak tinan 2022 iha suku Ritabou, postu administrativu Maliana, munisípiu Bobonaro, progresu fíziku badaen sira foin taka hotu kalen uma-kakuluk.

Xefe suku Ritabou, Maximiano dos Santos Araújo, hateten suku Ritabou hetan UNP hamutuk unidade 15 ne’ebé implementa iha aldeia Maganutu, Daitete, Uat no Ma-hui, kada aldeia hetan uma tolu.

Notísia relevante: Benefisiáriu UNP+ B uma-kain haat iha Holsa troka ona zinku ferujen

“Konstrusaun la’ós pregra kalen hotu ona, só hela de’it mak hariis-fatin ho dapur, tanba iha fallansu oituan, tanba ita hatene estrada balu ke kotu, liuliu atu ba Maganutu no Uat, tanba ne’e iha fallansu materiál, liuliu materiál lokál, liuliu rai-henek, fatuk no materiál loja nian,” nia informa ba Tatoli, iha Maliana, tersa ne’e.

Líder komunitária ne’e haktuir, hafoin semana rua nia laran ne’e hafoin udan-para oituan, badaen sira mós komesa hahú serbisu atubele aselera kontrusaun obra refere.

“Parese ke fulan ida ka rua sira bele finaliza ona konstrusaun, maibé depende ba natureza tanba ha’u-nia aldeia haat ne’e iha liu foho, balu atu ba maibé hakat mota Koléjiu nian, maske ponte iha ona, maibe atu ba to’o aldeia ne’e tenke hakuur mota mak foin bele ultrapasa,” nia hateten.

“Restu ida ne’e aldeia hitu ne’e dada rifa ba uma ida nune’e labele mosu diskute malu, ikus aldeia ida Ritabou ne’e mak dada kona, signifika katak ba tinan 2023 ne’e aldeia Ritabou mak hetan uma tolu, kompleta uma 15 ne’e,” nia katak.

Enkuantu aldeia hitu ne’ebé mak sei hetan UNP tinan ne’e mak hanesan, Halekou, Diru-Aben, Samelaun, Korluli, Ritabou, Timatan no Riti-Udu.

 Notísia relevante: Suku 13 iha Bobonaro seidauk implementa UNP regulár 2022

Jornalista   : Sergio da Cruz

Editór           : Evaristo Soares Martins

iklan
iklan

Leave a Reply

iklan
error: Content is protected !!