DILI, 30 novembru 2023 (TATOLI)–Ekipa téknika Negosiasaun Fronteira Terrestre Indonézia no Timor-Leste finaliza ona diskusaun, ne’ebé parte rua sei realiza asinatura tratadu fronteira terrestre iha janeiru 2024.
Primeiru-Ministru, Kay Rala Xanana Gusmão, hato’o apresiasaun boot ba ekipa téknika ne’ebé lori tempu hodi finaliza serbisu segmentu naun rezolvidu Noel Besi-Citrana iha fronteira terrestre iha Oé-cusse no Indonézia.
“Bainhira iha hanoin di’ak, vontade no espíritu atu hala’o serbisu ida, sei hasoru dezafiu oin-oin ho kompikadu, maibé ita sei to’o ninia finalidade ka pontu ikus liu hodi hetan naroman ida ba rai rua no povu rua nia interese. Tanba ne’e, ho imi hotu nia prezensa iha ne’e besik semana ida, ita bele dehan, ita-nia serbisu finaliza ona, talves iha terrenu ida halo diskusaun ho lian maka’as oituan ka la’o kleur ituan, maibé ita hotu nia esforsu ba objetivu ida atu defende interese nasaun no povu rua,” PM Xanana hateten durante hamutuk ho ekipa Gabinete Fronteira Marrítima oferese jantar kalan amizade ba Ekipa téknika Negosiasaun Fronteira Terrestre Indonézia no Timor-Leste, iha Hotel Timor, kinta ne’e.
Notísia relevante : Timor-Leste no Indonézia kontinua diskute fronteira terrestre
Xefe Governu dehan, ba kestaun ne’e nia labele agradese tanba fronteira terrestre nu’udar ema hotu nia dever no nasaun rua nia interese, maibé nia apresia profunda ba ekipa rua nia serbisu.
Ekipa rua hala’o serbisu hahú loron 20 to’o 27 novembru 2023, halo vizita to’o fronteira hodi finaliza segmentu naun rezolvidu Noel Besi-Citrana, ne’ebé lori tempu tinan-20 resin sai nu’udar vitória boot ida atu salvaguarda soberania nasionál, hametin seguransa, garante afinidade sosiu-kulturál, no sei lori benefísiu sosiu-ekonómiku ba nasaun rua.
Iha fatin hanesan, Xefe Ekipa Téknika Negosiasaun Fronteira Terrestre ba Segmentu Naun Rezolvidu Indonézia no Timor-Leste, Embaixadór Abdul Kadir Jailani, agradese ba Governu Timor-Leste ne’ebé simu ekipa no koopera serbisu ho di’ak.
“Obrigadu barak ba Primeiru-Ministru Xanana, Embaixadór Roberto inklui ekipa Timor-Leste no Indonézia. Ami sente onradu bele marka presenza iha kalan furak ida-ne’e, ne’ebé sai nu’udar sasin forte ba rai rua nia amizade. Master of Ceremonies (MC) hateten katak, ‘kolega ita bele hili, maibé viziñu ita labele hili’. Ida-ne’e realidade ida iha ita-nia moris, ida-ne’e hanesan evidénsia ida durante semana ida liu, ita susesu hala’o diskusaun fronteira terrestre entre rai rua,” Embaixadór Abdul Kadir Jailani hato’o.
Embaixadór Abdul apresia ekipa rua nia serbisu ne’ebé bele la’o ho susesu tanba apoia hosi Prezidente Repúblika Indonézia, Joko Widodo no Primeiru-Ministru Kay Rala Xanana Gusmão, hamutuk ho nia ekipa Gabinete Fronteira Marrítima no Terrestre.
Ho serbisu ne’ebé ekipa teknika finaliza ona, Estadu Indonézia hein Primeiru-Ministru Xanana bele hala’o vizita ofisiál bá Jakarta Indonézia iha inísiu tinan oin, hodi asina akordu formál ida.
“Agora ami hein prezensa Primeiru-Ministru Xanana iha Jakarta-Indonézia hodi finaliza akordu formál ne’e,” Embaixadór Abdul tenik.
Nune’e mós, Xefe Ekipa Téknika Negosiasaun Fronteira Terrestre ba Segmentu Naun Rezolvidu Timor-Leste no Indonézia, Embaixadór Roberto Soares, agradese ba ekipa ne’ebé envolve, ba domin no didikasaun tempu durante tinan barak to’o finaliza serbisu boot ne’e.
Durante serimónia, Primeiru-Ministru Xanana ho kontente entrega tais ba ekipa Indonézia no Timor-Leste nu’udar domin hodi haforsa lasu kooperasaun ekipa rua nia esforsu ne’ebé finaliza ona serbisu.
Iha oportunidade murak ne’e, Embaixadór, Abdul Kadir Jailani akompaña hosi Embaixadór Indonézia ba Timor-Leste, Sahat Sitorus entrega mós prenda ba Xefe Governu Xanana no kontinua kanta múzika amizade, ne’ebé ikus liu taka ho hasai fotografia hamutuk hosi ekipa rua.
Jornalista : Antónia Gusmão
Editora : Julia Chatarina
