iklan

BOBONARO, HEADLINE, MUNISÍPIU, SAÚDE

AKP-MS komemora loron mundiál HIV-SIDA iha Saburai

AKP-MS komemora loron mundiál HIV-SIDA iha Saburai

Asosisaun Progresu Komunitária, Ministériu Saúde no parseiru sira hamutuk ho komunidade suku Saburai, postu administrativu Maliana, munisípiu Bobonaro, sunu lilin-mean iha fita-mean nia laran hodi komemora loron mundiál HIV-SIDA. Imajen Tatoli/Sérgio da Cruz.

BOBONARO, 01 dezembru 2023 (TATOLI) – Asosiasaun Komunidade Progressu (AKP) ho Ministériu Saúde (MS) no parseiru Organizasaun Mundiál Saúde, Marie Stopes, Fundasaun Haburas Moris, Cruz Vermelha Timor-Leste no komunidade suku Saburai, postu administrativu Maliana, munisípiu Bobonaro, komemora loron mundiál HIV-SIDA, 01 dezembru ho tema ‘hakotu transmisaun HIV liuhosi teste raan’.

Atividade ne’e hala’o ho semináriu, teste raan no sunu lilin-mean iha fita mean nia laran hodi hanoin hikas timoroan ne’ebé mate ho HIV/AIDS.

Notísia relevante: Saúde Bobonaro deteta ema 118 afeta HIV/AIDS

“Selebrasaun kada loron 01 dezembru, objetivu atu eduka no konsiénsia públiku kona-bá HIV-SIDA,” Diretór AKP, Geraldo Maubete hateten iha intervensaun iha semináriu ne’e

Nia hatutan, loron mundiál HIV/SIDA la’ós selebra ida de’it kona-bá komunidade nia arenizasaun, maibé selebrasaun ne’e hanesan apelu ida ba asaun, ativasaun no apoia komunidade sira iha sira-nia papél lideransa.

Loron mundiál HIV-SIDA iha tinan 2023 ne’e ko’alia kona-bá esforsu sira atu halakon poténsia tomak lideransa komunitária nia hodi hapara AIDS hanesan rekomendasaun tuir mai.

“Ida kna’ar Lideransa komunitária tenke sai xave ba planu no programa hotu-hotu kona-bá HIV, iha formulasaun orsamentu monitorizasaun no avaliasaun, kna’ar lideransa komunitária nian tenke hetan finansiamentu tomak no fiar-na’in atubele hadi’ak nesesáriu sira núne’e mós hetan apoiu tuir ida-ne’e,” nia katak.

Reprezentante Prezidente Autoridade Munisípiu Bobonaro, Gisela Pirez, agradese ba AKP no parseiru sira tanba bele iha inisiativa realiza atividade ne’e hodi konsiensializa komunidade Saburai, luta hamutuk hakotu transmisaun HIV-AIDS.

“Ita hapara ho asaun konkretu liuhosi ita-nia hahalok, labele nakar duni, karik kaben-na’in sira, metin ba, karik foin tuir malu aprende didi’ak lai. Ita-boot sira hela iha fronteira, karik ba sorin atu hola buat ruma, labele buka ida midar-midar ne’e, orsida ida moruk mai aat liu, halo ita-nia isin ida furak ne’e la vale tiha kedas,” nia apela.

Koordenadór HIV/AIDS Diresaun Servisu Munisipál Bobonaro, Sidonio Gonçalves, informa, moras HIV/AIDS la’o lemo-lemo ona iha munisípiu Bobonaro, tánba ne’e nia apela ba komunidade sira iha Saburai no suku sira seluk atu voluntariamente ba hasai rai atubele prevene-aan sedu hosi virus ne’e.

“Saúde ne’e iha ita-nia liman rasik, sé ita la kria saúde ne’ebé di’ak, ita na’in rasik mak sei sofre, tanba moras HIV ne’e estraga ita-nia sistema imunidade hodi loke dalan ba moras sira seluk atu kona ita, to’o ita bele lakon vida,” nia fó hanoin.

Xefe suku Saburai, Abel Manu Mali, konsidera atividade importante tebes ba komunidade sira, tanba suku Saburai baliza kedas ho nasaun viziñu Atambua, Nusa Tenggara Timur (NTT) hanesan fatin risku ba transmisaun HIVD/AIDS.

“Hau sente atividade ida-ne’e importante tebes, ne’e duni ha’u fó hanoin ba komunidade sira, joven sira. Favór ida informasaun ne’e ohin imi hetan fahe fali ba ita-boot sira-nia kolega no família sira-ne’ebé seidauk hatene,” nia dehan.

Notísia relevante: TL rejista ema na’in-1.526 infetadu HIV/AIDS inklui óbitu 166

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!