iklan

NASIONÁL, HEADLINE, INKLUZAUN SOSIÁL

Governu aloka rihun $113 ba serimónia loron mundiál ema ho defisiénsia

Governu aloka rihun $113 ba serimónia loron mundiál ema ho defisiénsia

Koordenadór Komisaun Organizadora ba loron mundiál ema ho defisiénsia no atuál Diretór Jerál MSSI, Florêncio Pina Dias Gonzaga. Imajen Tatoli/Egas Cristóvão

DILI, 02 dezembru 2023 (TATOLI)Governu liuhosi Ministériu Solidaridade Sosiál no Inkluzaun (MSSI) aloka orsamentu $113 ba komemorasaun loron mundiál ema ho defisiénsia ne’ebé monu iha loron 03 dezembru.

“Ba eventu loron mundiál ema ho defisiénsia ne’ebé hahú ho atividade desportu, dansa, feira ba produtu lokál inklui han-hemu, ita aloka rihun 113. Ida-ne’e inklui mós viajen bá-mai nian,” Koordenadór Komisaun Organizadora ba loron mundiál ema ho defisiénsia no atuál Diretór Jerál MSSI, Florêncio Pina Dias Gonzaga, informa ba Agência Tatoli, iha komemorasaun loron mundiál ema ho defisiénsia, iha Sentru Konvensaun Dili (CCD, sigla Portugés), sábadu ne’e.

Komemorasaun loron mundiál ne’e ho tema: ‘Unidu iha asaun hodi salva no alkansa meta Objetivu Dezenvolvimentu Sustentável ba ho hosi ema ho defisiénsia’.

Notísia relevante : ADTL husu instituisaun hotu tenke garante asesibilidade ba ema ho defisiénsia

Diretór Jerál esplika, tema ne’e katak asaun hotu-hotu ba ema ho defisiénsia sira tenke iha kontestu unidu, nune’e bele kontribui ba dezenvolvimentu nasionál.

“Tanba ne’e mak MSSI hamutuk ho ministériu relevante seluk nafatin apoia no reforsa instituisaun sira iha tinan ne’e ho tinan oin atu sira bele implementa sira-nia programa ba ema ho defisiénsia iha territóriu nasionál, nune’e bele atinje Objetivu Dezenvolvimentu Sustentável, katak la husik ema ida iha kotuk, ita hotu hamriik iha liña ida ne’ebé hanesan,” nia akresenta.

Kada munisípiu reprezenta ema ho defisiénsia hamutuk na’in-10 no iha na’in-haat seluk mak akompaña sira durante loron-lima hodi hala’o atividade desportiva hanesan simulasaun animasaun jogu hiit besi, múzika, basketból, badminton no no seluk tan.

“Ho partisipasaun ne’ebé barak hosi ema ho defisiénsia oin-oin, entaun ami aluga otél neen to’o ualu hodi sira deskansa hahú loron 30 novembru to’o 03 dezembru inklui, han-hemu nian. Otél ida mak Vila Verde no balun iha Hudi-laran. Ita iha difikuldade osan, entaun ita buka otél ho presu naton,” Koordenadór tenik.

Iha komemorasaun ne’e, Komisaun Organizadora prepara fatin hamutuk 30-resin ba ema fa’an no aprezenta produtu, ne’ebé maioria ema ho defisiénsia mak prenxe barraka ne’e, maibé iha mós parseiru balun ne’ebé marka prezensa iha fatin ne’e.

Joana Soares de Jesus, ne’ebé hanesan to’os-na’in, hateten, maski ho kondisaun defisiénsia, maibé iha esperansa ba oan sira tenke eskola.

“Ha’u loron-loron halo to’os hodi kuda modo no fa’an, ha’u kontente halo to’os ne’e no hakiak animál sira hodi ba fa’an no ohin loron ha’u-nia oan balun eskola Pre-Sekundária, Sekundária no ida mak agora iha universitáriu ida iha Dili,” nia dehan.

Tuir observasaun jornalista Agência Tatoli, nota katak durante eventu, ema ho defisiénsia sira kontente tanba bele espresa sira-nia hanoin no sentimentu liuhosi atividade desportiva.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!