VIQUEQUE, 05 dezembru 2023 (TATOLI)—Organizasaun naun governamentál, Care International iha Timor-Leste komprometidu apoia munisípiu Viqueque responde impaktu dezastre naturál ne’ebé afeta ba abitante sira.
“Ami-nia prezensa iha munisípiu Viqueque liuhosi programa ‘prontu ba dezastre’ atu apoia abitante sira. Nune’e, ami halo ona observasaun no foti informasaun sira hosi abitante Viqueque sira kona-ba risku sira-ne’ebé afeta ba abitante sira,” Jerente Care International munisípiu Viqueque, Izal Coreia Pinto, informa ba Agência Tatoli, iha postu Viqueque, tersa ne’e.
Notísia relevante : CARE selebra akordu ho ONG lokál rua atu hametin servisu saúde
Care International Viqueque rekolla ona informasaun hosi abitante lokál atu aprezenta ba parseiru hodi hetan suporta, nune’e bele apoia situasaun emerjénsia bainhira abitante afeta risku hosi fenómenu El Nino (anin no udan) no La Niña (bailoro naruk).
“Ha’u hanoin ita presiza rekursu ba preparasaun hasoru fenómenu El Nino ne’ebé akontese, atubele jere liu-liu ba bee no ai-han. Karik akontese bailoro naruk to’o fulan-tolu tan, ha’u sente sei afeta maka’as ba komunidade tanba ita labele kuda ai-han tuir tempu tanba laiha bee. Entaun ida-ne’e sei afeta ba abitante sira,” nia hato’o.
Aleinde ne’e, liuhosi programa ‘prontu ba dezastre’ Care Internationál halo mitigasaun ki’ik iha suku 15 munisípiu Viqueque hodi halo konservasaun bee-matan hodi distribui ba abitante sira asesu.
Jornalista : Vitorino Lopes da Costa
Editora : Julia Chatarina
