DILI, 05 dezembru 2023 (TATOLI)—Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, hateten hosi inísiu to’o agora ne’e fundu kontributivu kombatente libertasaun nasionál hamutuk millaun $39-resin mak iha konta veteranu nian.
Notísia Relevante: Fundu kontributivu kombatente iha osan-funan hamutuk $960.000
“Ita iha ona millaun $39-resin no ho nia lukru hamutuk millaun $40-resin,” Ministru Oan Soru hateten ba Agência Tatoli, hafoin halo audiénsia públiku ho Komisaun F, iha Parlementu Nasionál, segunda ne’e.
Veteranu sira iha territóriu nasionál ne’ebé kada fulan kontribui $30 ne’e hamutuk ema na’in-27.828.
Prezidente Konsellu Kombatente Libertasaun Nasionál (CCLN-sigla Portugés), Vidal de Jesus “Reak Leman”, hateten hosi ema 27.828 ne’e, inklui veteranu sira-ne’ebé mate ona mós nafatin fó kontribuisaun ba fundu kontributivu ne’e.
Tanba ida-ne’e, nia dehan, fó benefísiu ba sira-nia oan sira-ne’ebé daudaun ne’e subtitui hodi simu osan nia aman ka inan nian.
Nune’e, IX Governu Konstitusionál nia polítika atu garante sustentabilidade ba veteranu sira-ne’ebé atu transforma ba investimentu ida hodi husik hela ba veteranu nia oan sira,” nia hateten.
Kriasaun fundu kontribuitivu veteranu nian ne’e, ninia baze legál iha aprovasaun dekretu-lei númeru 8/2020, alterasaun ba dekretu -lei númeru 15/2008 ba pensaun-liuhosi Konsellu Ministru, promulgadu hosi Prezidente Repúblika iha 19 marsu 2020, hodi kria Gabinete Apoiu Programa Fundu Investimentu Veteranu Timor-Leste ne ebé despaixu deside hosi numeru 01/MACLN SEACLN/I/2020 tau matan ba fundu investimentu.
Jornalista : Osória Marques
Editór : Cancio Ximenes
