VIQUEQUE, 04 dezembru 2023 (TATOLI)–Juventude munisípiu Viqueque ne’ebé hetan apoia hosi Ministériu Juventude, Desportu no Kultura (MJDK) loke kompetisaun desportu ho modalidade maratona ba joven feto no mane hamutuk na’in-64 hodi festeza loron istóriku Timor-Leste.
Reprezentante Komisaun Organizadora, Leopoldo da Costa Alves, hateten, objetivu kompetisaun ne’e atu kaderniza no promove talentu joven sira, liu-liu mentalidade no fíziku.
“Tanba ne’e, ami hakarak kria maratona ida-ne’e ba joven sira iha postu Viqueque Vila hodi hatudu sira-nia talentu. Aleinde ida-ne’e ita hakarak festeza loron istóriku, hahú loron 12 to’o 28 novembru no 07 dezembru, ne’ebé hanesan loron invasaun,” Leopoldo da Costa Alves, informa iha kampu futeból, Beloi, segunda ne’e.
Notísia relevante : Postu Viqueque Vila sei loke kompetisaun maratona komemora loron nasionál juventude
Komisaun sei oferese prémiu ba manán-na’in sira, hosi klasifikasaun dahuluk to’o dahaat ba kategoria feto no mane.
“Ami mós prepara prémiu ba vensedór sira maibé ida-ne’e ami-nia planu, ami labele fó sai ba públiku, maibé atleta sira labele hanoin ba montante prémiu ne’ebé prepara,” nia akresenta.
Komisaun ba oin sei organiza tan eventu desportu martona iha munisípiu Viqueque hodi envolve mós joven sira hosi postu administrativu lima iha Viqueque.
“Eventu maratona ne’e ami foin hahú dahuluk, nune’e ba oin ami sei prepara di’ak liután atu envolve joven sira iha munisípiu Viqueque sira ne’ebé iha talentu, liu-liu ba modalidade maratona,” nia tenik.
Kompetisaun maratona ne’e hahú tuku 09:00 dadeer, halai ho distánsia kilómetru 12, ho rota hahú hosi kampu futeból Beloi, Buanurak, dalan foun no sei ramata iha kampu foteból Beloi. Programa ne’e nakloke ba ema hotu la haree ba idade.
Maratona ba kategoria ba feto partisia hosi ema na’in-12 ho distánsia kilométru 3, ho rota hahú kampu futeból Beloi mosu iha ponte Ueradek, edifísiu edukasaun Viqueque no finál iha kampu futeból Beloi.
Eventu Maratona ne’e hetan akompaña hosi Unidade Tránzitu munisípiu Viqueque no ekipa Serbisu Saúde munisípiu Viqueque.
Jornalista : Vitorino Lopes da Costa
Editora : Julia Chatarina
