COVALIMA, 05 dezembru 2023 (TATOLI) – Empreza Timor Resources konstrui sala han fatin ba ospitál referál Suai, nune’e família pasiente sira bele utiliza.
Konstrusaun sala ne’e remata ona no Diretora-Ezekutiva Timor Resources, Suellen Osborne, inaugura ona sala refere.
“Inaugurasaun fatin foun iha óspital ne’e prepara ba família no ba belun moras sira. Sai mós mahon ida ne’ebé bele haburas domin, forsa no lolo liman ba malu iha tempu susar”, Suellen Osborne hato’o iha ospitál referál, ohin.
Nia dehan Timor Resources harii sala refere ba família pasiente sira maski la’ós fatin ne’ebé furak tuir obra arkitetu, maibé hatudu kompromisu hodi hamriik hamutuk ho komunidade Suai ne’ebé presiza.
“Harii sala han fatin ba família ida-ne’e hatudu ami-nian dedikasaun hodi fó apoiu ba sira ne’ebé buka hela tratamentu ba sira-nian moras atu hetan di’ak iha óspitál”, dehan.
Diretora-Ezekutiva Timor Resouces nia vizita iha munisípiu Covalima aleinde inaugira sala, hala’o mós atividade sira hanesan enkontru ho Administradór Munisípiu Covalima, distribui ai-han ba komunidade suku Camanasa, Debos, Matai, Labarai no Tashilin.
Jornalista: Celestina Teles
Editora: Maria Auxiliadora
