BOBONARO, 06 dezembru 2023 (TATOLI) – Konsellu Imprensa (CI, sigla portugés) Timor-Leste, kuarta ne’e sensibliza Lei Komunikasaun Sosiál kona-bá direitu hatán no ratifikasaun ba autoridade munisípiu Bobonaro, diretór liña ministeriál no delegasaun territoriál sira no autoridade seguransa sira iha munisípiu ne’e.
Prezidente CI, Otelio Ote, esplika, sensibilizasaun ne’e nu’udar atividade kontinuasaun ne’ebé CI halo ona iha munisípiu sira seluk oinsá atu eleva sosiedade tomak liuliu autoridade sira-nia koñesimentu kona-bá konteúdu hosi lei refere.
“Importante ba autoridade sira hodi hatene loloos konteúdu hosi lei ne’e no mós sira bele implementa iha sira-nia munisípiu idak-idak, tanba ita hatene katak autoridade sira loron loron hasoru jornalista sira no jornalista sira mós hasoru autoridade, entaun sira presiza intende lei komunikasaun sosiál,” nia informa ba jornalista sira iha salaun Cruz Vermelha Timor-Leste filiál Maliana.
Nia agradese ba autoridade munisípiu Bobonaro no partisipante hotu tanba ativu loos hodi buka hatene kona-ba papél jornalista, kualidade notísia, kodigu étika jornalita no papél Konselu Imprensa nian.
“Ida-ne’e valór pozitivu ba Konselu Imprensa no komunidade mídia, atu neneik neneik ita iha presepsaun ida kona-bá papél mídia no papél jornalista iha ita-nia rai,” nia katak.
Reprezentante Prezidente Autoridade Munisípiu Bobonaro, Egídio Loi Siga, agradese ba CI tanba durante ne’e autoridade munisípiu no funsionariu liña ministeriál sira seidauk intende konteúdu hosi lei ne’e no papél jornalista sira nian.
“Ita hotu adapta ona katak, ba jornalista sira iha direitu atu ba iha atividade ne’ebé mak iha ona, ho ida-ne’e ha’u solisita funsionariu sira utiliza meiu komunikasaun sosiál iha ita-boot sira-nia fatin tuir lei komunikasaun sosiál,” nia hateten.
Notísia relevante: CI sensibiliza lei komunikasaun sosiál ba autoridade Covalima
Jornalista: Sérgio da Cruz
Editór: Evaristo Soares Martins
