DILI, 06 dezembru 2023 (TATOLI)—Ministru Planeamentu no investimentu estratéjiku, Gastão Francisco de Sousa, aprezenta Projetu Dekretu-Lei kona-ba alterasaun dahuluk Dekretu-Lei númeru 3/2023, 15 fevereiru ne’ebé kria Komisaun Nasionál Aprovizionamentu (CNA, sigla portugés), no aprova ninia estatutu, iha reuniaun Konsellu Ministru ordinária, kuarta ne’e, ne’ebé hetan ona aprovasaun.
“Intervensaun lejizlativa ida-ne’e iha objetivu prinsipál rua, ba dahuluk atu define misaun CNA no objetivu , modelu governasaun, regra funsionamentu no ninia remunerasaun,” haktuir nota ne’ebé Agência Tatoli asesu hafoin reuniaun ezekutivu, iha Palásiu Governu.
Ba daruak, atu haboot atribuisaun CNA nu’udar servisu públiku espesializadu iha instrusaun prosedimentu sira aprovizionamentu, ho objetivu akizisaun ne’ebé justa, efisiente, ekonómika, bazeia ba prinsípiu optimizasaun husi relasaun kustu benefísiu.
Notísia relevante : CNA lansa ona konkursu ba projetu 352 ho kustu biliaun $1,3
Tuir diploma ida-ne’e, CNA maka servisu personalizadu Estadu, ne’ebé integra iha Administrasaun Indireta Estadu, tutela ba Ministériu Planeamentu no Investimentu Estratéjiku, ho autonomia administrativa, finanseira no patrimóniu rasik.
CNA iha misaun atu asegura implementasaun lejizlasaun kona-ba aprovizionamentu, instrui prosedimentu sira aprovizionamentu ho justu, efisiente no ekonómiku, fó apoiu iha instrusaun prosedimentu aprovizionamentu ne’ebé servisu no entidade setór públiku administrativu halo, kontribui hodi uniformiza prosedimentu sira no instrui prosesu sira iha ámbitu rejime kontraordenasionál ne’ebé prevee ona iha rejime jurídiku aprovizionamentu, kontratu públiku no ninia infrasaun sira.
Entre atribuisaun sira seluk, kabe ba CNA atu instrui prosedimentu aprovizionamentu ho valór hanesan ka boot liu millaun $1 hosi servisu no entidade setór públiku administrativu no projetu sira ne’ebé abrigu ba fundu infraestrutura, la haree ba nia valór.
Jornalista : Antónia Gusmão
Editora : Julia Chatarina
