Falur Rate Laek motiva xefe suku eleitu hosi Viqueque kria planu estratéjiku
VIQUEQUE, 06 dezembru 2023 (TATOLI)–Xefe Estadu Maiór Jenerál FALINTIL-Forsa Defeza Timor-Leste (F-FDTL) Tenente Jenerál, Domingos Raul ‘Falur Rate Laek’ motiva xefe suku eleitu sira iha munisípiu Viqueque atu kria planu estratéjiku dezenvolvimentu iha suku ida-idak nian.
“Dahuluk ha’u parabéns ba Xefe suku eleitu no la eleitu sira tanba organiza eleisaun ho susesu iha munisípiu Viqueque tanba la’o ho hakmatek. Ha’u prefere Xefe suku eleitu sira tenke kria planu estratéjiku ida ba suku ida-idak, atu imi (xefe suku) sira bele implementa tuir,” Falur Rate Laek hateten ba Agência Tatoli, iha suku Lui-Huno, tersa ne’e.
Nia dehan, Xefe suku sira tenke eskolla suku ida-idak ninia poténsia ba área saida de’it tenke identifika hodi tau ba planu prioridade suku.
“Imi (Xefe suku) tenke eskolla imi-nia rai ninia poténsia ba setór saida de’it, hanesan agrikultura, turizmu hodi suku bele halo jestaun atu fó retornu no abintente sira,” nia akresenta.
Notísia relevante : Kandidatu xefe suku 22 Viqueque kompete iha eleisaun segunda volta
Aleinde ne’e líder F-FDTL ne’e husu ba veteranu sira Viqueque tenke fó apoiu ba autoridade suku hodi halo dezenvolvimentu iha ida-idak ninia suku
“Ha’u husu ba veteranu sira Viqueque sira tenke kontribui ba autoridade hodi halo dezenvolvimentu suku. Ha’u lakohi veteranu sira hanoin maka osan, tanba ida-ne’e ita kontra ona prinsípiu ukun rasik-an. Ha’u hakarak ne’e ita-nia suku hotu-hotu ne’e tenke halo planu no envolve abintante hotu,” nia fó hanoin.
Falur husu veteranu Viqueque kontribui ideia ba Autoridade lokál tanba veteranu maka na’in ba nasaun no harii nasaun.
“Depois sira halo fali hahalok seluk dehan sira maka iha lei nia leten, autoridade sira nia leten ida-ne’e ha’u sente ladún di’ak tanba agora ita tenke halo trazisaun,” nia hato’o.
Xefe suku eleitu iha munisípiu Viqueque hamutuk na’in-35 hosi postu administrativu lima hanesan Viqueque Vila, Ossu, Lacluta, Uatucarbau no Uatulari.
Jornalista : Vitorino Lopes da Costa
Editora : Julia Chatarina
