DILI, 06 dezembru 2023 (TATOLI)—Governu liuhosi reuniaun ordinária Konsellu Ministru, kuarta ne’e aprova projetu Dekretu-Lei, ne’ebé aprezenta hosi Ministra Solidariedade Sosiál no Inkluzaun, Verónica das dores, ba revogasaun Dekretu-Lei númeru 22/2022, 10 novembru, ne’ebé kria subsídiu ba inan isin-rua no ba labarik sira, ne’ebé hanaran ‘bolsa da mãe jerasaun foun’.
Revogasaun programa bolsa da mãe jerasaun foun ne’ebé estabelese hosi Dekretu-Lei númeru 22/2021, loron 10 novembru, sai hanesan baze ba avaliasaun krítika ida hosi polítika asisténsia sosiál ne’ebé iha vigór.
“Governu rekoñese importánsia atu proteje labarik ki’ik sira, hanesan konsagra ona iha Konstituisaun Repúblika Demokrátika Timor-Leste, maibé hatene katak importante halo ajustamentu hodi garante distribuisaun ida ne’ebé efikás ba rekursu sira,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.
Notísia relevante : Orsamentu Bolsa da Mãe Jerasaun Foun la prevee iha OJE 2024
Governu konsidera katak protesaun sosiál ba inan isin-rua importante tebes atu proteje labarik ki’ik sira (infánsia), maibé hatene katak molok fó kontinuidade ba disponibilidade subsídiu apoia sosiál ba inan isin-rua, importante ba Estadu hala’o estudu impaktu ida hosi rezultadu sira ne’ebé alkansa ona no objetivu atu alkansa ba redusaun vulnerabilidade no korrespondénsia ho polítika natalidade país nian.
Bolsa da mãe jerasaun foun mak programa transferénsia osan ne ebé estabelese bazeia ba Dekretu-Lei númeru 22/2021, loron 10 novembru.
Programa ne’e hahú ona iha Ainaro, Bobonaro, no RAEOA iha tinan 2022 no iha Covalima, Liquiçá, Manatuto no Viqueque iha tinan 2023.
Subsídiu kada fulan ba inan-isin rua $15, labarik tinan 0-3 $20 no labarik ho moras króniku ka difisénsia.
To’o loron 31 agostu 2023 liubá, benefisiáriu bolsa da mãe jerasau foun hamutuk 53.512 mak rejistradu, ne’ebé kompostu hosi inan isin-rua 9.601, labarik 43.413, labarik ho defisiénsia 198.
Hosi totál benefisiáriu ne’ebé rejistradu, Ministériu Solidaridade Sosiál no Inkluzaun (MSSI) aprova 51.326, kompostu hosi inan isin-rua 9.037, labarik 42.104, no labarik ho defisiénsia 185.
Aleinde ne’e, Konsellu Ministru aprova alterasaun daruak hosi Dekretu-Lei númeru 18/2012, 04 abríl ne’ebé kria subsídiu apoia konfisionál ‘bolsa da mãe’.
“Ho diploma ida-ne’e, halo reforsu ba subsídiu apoiu kondisionál bolsa da mãe’, ho aprezentasaun valór ba subsídiu mensál ne’ebé la hanesan, hosi $8 to’o $10, ho baze iha siklu eskolár ba labarik benefisiáriu sira, nune’e insentiva sira-nia frekuénsia eskolár,” nota hosi ezekutivu esplika.
Valór sira ne’ebé destina ona ba labarik sira ho defisiénsia ho idade eskolár no ne’ebé frekuenta hela eskola sei aumenta $5, ne’ebé inisiativa ne’e promove ekuidade.
Nune’e, Governu konsidera katak importánsia boot hosi partisipasaun iha eskola maka bainhira benefisiáriu ikus sira ho idade kompatível sei sai kritériu ida hosi kritériu sira ne’ebé estabelese ona, tamba iha sentidu ida-ne’e integra polítika asisténsia sosiál ba perspetiva edukasionál ida.
Jornalista : Antónia Gusmão
Editora : Julia Chatarina
