Dom Leandro Maria Alves husu krismadu Viqueque sai defensór ba Kristu
VIQUEQUE, 07 dezembru 2023 (TATOLI)—Bispu Dioseze Baucau, Dom Leandro Maria Alves, husu sarani hamutuk 757 hosi Parókia Viqueque Vila ne’ebé hetan sakramentu krisma, tenke sai defensór ba Kristu.
“Ha’u husu ba krismadu, katak imi tenke sai defensór ba Kristu no imi simu sakramentu krisma ida-ne’e, imi rasik maka hakarak deklara, imi maduru loos ona iha imi-nia fiar nu’udar sarani nian,” Dom Leandro Maria Alves, hateten iha ninia omília fó krima ba sarani sira, iha kapela Uetali, kinta ne’e.
Aleinde ne’s, Amu Bispu husu krismadu sira hatudu hahalok di’ak iha moris loron-loron, tuir espirítu santu ne’ebé maka krismadu sira simu hodi kria dame no moris ho domin.
“Ha’u husu imi tenke hadook-an hosi hahalok violénsia sira, ita-nia rai no komunidade hasoru hela situasaun barullu iha fatin ne’ebé de’it. Halo ema barak maka moris la hakmatek, ne’e duni imi sira ne’e tenke buka haka’as-an atu hatuur imi-nia moris tuir promesa ne’ebé maka imi halo,” Dom Leandro hato’o.
Notísia relevante : Dom Leandro inaugura kapela Uetali Viqueque
Nia dehan, promesa baptizmál bainhira simu batizmu hanesan momentu sei ki’ik hakribi satanas no ninia hahalok sira, hodi fiar ba Maromak atu harii komunidade ne’ebé iha domin no liberdade.
“Ohin krismadu sira simu ona espirítu santu, ne’ebé sei habrani imi atu sai sasin Kristu nian. Tanba Kristu dehan, ha’u haruka imi bá. Jesus haruka imi bá atu hadomi la’ós bá atu estraga ema-nia sasán sira no la’ós baku ema, maibé bá atu hadomi malu,” nia fó hanoin.
Iha fatin hanesan, Xefe suku Uma-Uain Kraik, postu Viqueque Vila, Ângelo Miguel da Silva Soares, sente orgullu tanba Dom Leandro Maria Alves fó krisma ba sarani sira iha suku ne’ebé nia lidera inklui suku 10.
“Dom Leandro Maria Alves foin dahuluk marka presezensa iha ne’e hodi fó mós krisma ba sarani sira,” nia tenik.
Krismandu, Deonisia Amaral Pinto, sente ksolok tanba hamutuk ho krismandu seluk bele simu ona krisma hosi Dom Leandro Maria Alves.
“Ami bele kompleta sakramentu balun iha ami-nia moris. Ami mós hola parte iha Kristu,” nia hato’o.
Misa krismadu ne’e hetan partisipasaun hosi família krismadu, sarani hosi postu Viqueque Vila, Autoridade komunitária inklui veteranu sira iha munisípiu Viqueque.
Jornalista : Vitorino Lopes da Costa
Editora : Julia Chatarina
