VIQUEQUE, 07 dezembru 2023 (TATOLI)—Bispu Dioseze Baucau, Dom Leandro Maria Alves, kinta ne’e, inaugura Kapela Nossa Senhora Maria dos Anjos Uetali, iha área Uetali, suku Uma-Uain Kraik, postu Viqueque Vila, munisípiu Viqueque.
Hafoin serimónia inaugurasaun, Amu Bispu agradese ba sarani no Autoridade lokál ne’ebé ho inisiativa hamutuk ho Parókia Viqueque Vila no Parókia Geelong Austrália bele harii kapela ida ba sarani sira iha Uetali.
“Kapela harii ona, sarani sira labele abandona kapela ida-ne’e, la’ós ohin ita inaugura fila kotuk fali ba kapela, tanba dalaruma ita inaugura kapela hotu ita husik no abandona. Prezensa kapela iha ita-nia le’et hodi hatudu ita-nia saudades ba Na’i Maromak,” Dom Leandro Maria Alves, hateten, iha Kapela Uetali.
Notísia relevante : Don Virgílio Kardeál inaugura kapela São Francisco Xavier iha Lifau
Amu Bispu dehan, tanba sarani hotu fó liman hamutuk no ema di’ak ninia kontribuisaun tomak to’o ikus mai konsege harii kapela.
“Ne’e duni ita bele serbisu oinsá mós ita labele haluha Na’i Maromak iha ita-nia vida. Tanba ne’e, hakat bá kapela ida-ne’e hodi simu komiñaun ne’ebé importante tebes no banhira ita hamutuk halo orasaun iha uma ida-ne’e maka hametin liután ita-nia fiar tanba kapela ne’e halibur hamutuk hodi koñese malu,” nia subliña.
Kapela ida-ne’e halo sarani katólika sira hadomi malu liután bainhira koñese malu ho didi’ak.
“Ha’u agradese ba Parókia Geelong Austrália, maski dook maibé sira-nia reprezentante iha Timor-Leste bele fó apoia ba sarani sira hodi harii kapela tanba sira iha domin ba sarani sira iha Uetali,” nia hato’o.
Iha fatin hanesan, Pároku Viqueque Vila, Evaristo António da Costa, relata, kapela Uetali hahú harii iha tinan kotuk no foin finaliza iha tinan 2023.
“Ha’u agradese ba sarani sira hosi Parókia Geelong Austrália ne’ebé fó apoia orsamentu hamutuk $23.000 resin no kontribuisaun hosi sarani Uma-Uain Kraik sira mak ita iha kbiit hodi harii uma orasaun ida-ne’e,” nia akresenta.
Nune’e mós, xefe suku Uma-Uain Kraik, Âgelo Miguel da Silva Soares, hateten, suku ne’e iha aldeia sia fahe ba sentru tolu, iha Ratahu kapela ida, Naeboruk no sentru Uetali aldeia hamutuk haat maka daudaun ne’e foin finaliza konstrusaun kapela ida.
“Durante ne’e sarani sira hela iha sentru Uetali laiha kapela ida, agora maka foin, iha kapela ne’ebé hetan apoia hosi Geelong Austrália no sarani sira nune’e maka ami konsege harii kapela ida-ne’e. Ha’u lori sarani Uetali nia naran, hakarak agradese ba apoiu tomak,” nia tenik.
Uma-Uain Kraik iha aldeia sia, kompostu hosi Bosabein, Cailoi, Duducai, Fahi Berec, Fatuhadan, Halderai, Loho, Naeboruc, Uhacae, ho totál populasaun 4.454 (sensu tinan 2015).
Durante serimónia inaugurasaun, Amu Bispu fó bensaun, akompaña hosi sarani, Autoridade lokál no veteranu sira iha postu Viqueque Vila.
Jornalista : Vitorino Lopes da Costa
Editora : Julia Chatarina
