Juventude Viqueque komemora loron istóriku ho dansa kulturál
VIQUEQUE, 07 dezembru 2023 (TATOLI)—Juventude munisípiu Viqueque ho inisiativa komemora loron invazaun Indonézia (07 dezembru 1975) ba dala-48 ho atividade dansa kulturál hodi promove identidade Timor-Leste.
Repzentante Administradór Viqueque, Cosme Sarmento, hateten, Timor-Leste hetan vitória independénsia liuhosi prosesu naruk, ne’ebé molok hetan restaurasaun independénsia, povu barak mak terus hosi invasaun Indonézia.
“Ohin kalan ita halibur hamutuk iha fatin ida-ne’e, ho inisiativa hosi joven ne’ebé fuan boot, hakarak festeza no halo atividade dansa kulturál hodi anima ita. Militár Indonézia tama Timor iha loron 07 dezembru 1975, enkuantu iha loron 28 novembru 1975 ita deklara ona proklamsaun unilaterál, ne’ebé iha momentu ne’ebá ita-nia Avo Francisco Xavier do Amaral maka asume knaar nu’udar Prezidente Repúblika,” Cosme Sarmento, haktuir ba Agência Tatoli, iha eventu komemorasaun loron istóriku, kampu futeból, Beloi, kinta ne’e.
Notísia relevante : Alkatiri: Invazaun 07 dezembru nu’udar pontu importante iha TL nia istória
Nia konsidera, eventu ne’e atu relembra filafali istória pasadu sira-ne’ebé povu Timor-Leste hasoru tanba povu barak maka oferese no sakrifika-an hodi hasoru invazór sira.
“Se iha momentu ne’eba ita ho forsa de’it, dalaruma ita la manán funu tanba ne’e maka fahe ba forsa diplomátika, kladestina no armada hodi reforsa ita-nia luta libertasaun. Durante okupasaun Indonézia, joven barak maka lakon sira-nia vida tanba hakarak ukun rasik-an,” nia akresenta.
Tanba ne’e, nia husu joven sira tenke kontinua luta hanesan joven rezisténsia sira ne’ebé luta ba ukun rasik-an, la’ós kria de’it problema maibé tenke kria pás no unidade.
“Ha’u mós joven rezisténsia ida, ha’u haree joven agora la’ós hanesan joven rezisténsia uluk, joven sira maka sai fali inimigu ba malu. Ida-ne’e hanesan problema boot ne’ebé ita enfrenta iha ita-nia rai. Joven sira tenke muda hanoin no prepara-an tanba sira nu’udar kontinuadór hodi lori nasaun ba oin, tanba ne’e tenke prepara-an hosi agora kedan,” nia fó hanoin.
Iha fatin hanesan, Prezidente Komisaun Organizadora, Rau Pereira, hateten, komemorasaun loron istóriku ida-ne’e hodi halo atividade dansa kulturál ba labarik sira ho objetivu jerasaun foun sira bele hatene istória pasadu.
“Ho enventu sira-ne’e, ami joven Viqueque hakarak valoriza loron istóriku sira atu jerasaun foun sira bele hatene istória pasadu Timor-Leste, hanesan 07 dezembru 1975. Tanba ne’e, ami ohin kalan kria dansa kulturál ba labarik sira. Aleinde ne’e, ita bele promove identidade kultura sira liuhosi dansa kulturál ba labarik sira ho vestuáriu tradisionál Timor,” Raul haktuir.
Dansa kulturál ne’e partisipa hosi grupu ualu maka ho vistiáriu hanesan tais, selenda no kaibauk iha ulun no seluk tan, ne’ebé kada grupu mai ho ninia múzika dansa kulturál ne’ebé labarik sira apreende.
Aleinde ne’e, labarik hosi tinan 5 to’o 9 maka partisipa ba dansa kulturál ne’e.
“Ita haree eventu dansa kulturál ne’ebé labarik sira dansa ne’e atrai tebes ema asiste no labarik sira komprometidu atu apreende dansa sira-ne’e. Eventu ida-ne’e ami hetan apoia oituan hosi Ministériu Juventude Desportu no Kultura (MJDK),” nia releta.
Duremte eventu abitante lokál nakonu iha kampu futeból hodi asiste dansa kulturál.
Serimónia ne’e hetan partisipasaun hosi Autoridade no abitante lokál, Diretór liña ministeriál, sosiadade sivil no hetan seguransa hosi Polísia Nasionál Timor-Leste (PNTL) Viqueque.
Jornalista : Vitorino Lopes da Costa
Editora : Julia Chatarina
