Diákonu rua no Frater haat iha Viqueque simu ordenasaun

VIQUEQUE, 08 dezembru 2023 (TATOLI)—Diákonu na’in-rua no Frater na’in-haat simu ordenasaun hosi Bispu Dioseze Baucau, Dom Lendro Maria Alves, sesta ne’e, iha Igreja Imaculda da Conceição, Tilou, postu Viqueque Vila, munisípiu Viqueque.

Diákonu rua ne’e mak hanesan Justino Afonso Aquino Pinto no Waldimiro Afonso Viana, enkuantu Frater haat mak hanesan Câncio de Carvalho, Domingos Baptista Fonseca, Helder do Carmo Gomes no Alberico da Costa.

Dom Lendro Maria Alves, hateten, ordenasaun diakonál katak simu knaar datoluk grau hosi Santa Kreda, liu-liu atu haklaken Evangelu, tulun Amu Bispu no Na’i-lulik sira iha Na’i nia altar Santu nomós tulun ema ki’ak sira iha sosiadade.

“Família sira oferese ona sira-nia oan ba igreja, maski ho mataben, maibé ne’e mataben ksolok tanba mai hosi Maromak no sei fila bá Maromak, ida-ne’e maka Diákonu na’in-rua no Frater na’in-haat deside ona sira-nia an la’o tuir dalan Maromak nian,” Amu Bispu, dehan, liuhosi ninia omília iha misa ordenasaun iha Igreja Imaculda da Conceção, Tilou.

Notísia relevante : Dom Leandro Maria Alves husu krismadu Viqueque sai defensór ba Kristu

Tanba ne’e, nia konsidera família nia mataben hanesan fó agradese ba Maromak tanba grasa ne’ebé haraik ba inan, aman no família.

“Oinsá ita kolabora no fó dalan ba oan sira atu oan sira bele deskobre Maromak nia kovite ne’ebé tau ba ema ida-idak, nune’e mós Diákonu na’in-rua ne’ebé hetan ordenasaun sai Na’i-lulik no Frater na’in-haat ne’ebé ba Diákonu, sira sei la’o tuir dalan Maromak nian, tanba sira maka deside sira-nia an,” Dom Lendro akresenta.

Amu Bispu esplika, sakramentu orden ba Na’i-lulik sira atu konfigura sira-nia an ho Kristu nia saserdote atu konstrui Kristu nia isin-lolon. Tanba sai Diákonu susar tebes hafoin atinje, nune’e presiza nafatin família sira-nia orasaun, ba Frater na’in-haat ne’ebé sai Diákonu no Diákonu na’in-rua ne’ebé sai ona Na’i-lulik atu sira bele hala’o sira-nia misaun ho di’ak.

“Atu sai hanesan ne’e susar tebes. Tanba ne’e, ha’u husu ba família sira hotu-hotu nafatin halo orasaun ba sira. Nune’e mós, ha’u hato’o parabéns ba Diákonu no Na’i-lulik sira-nia inan no aman ne’ebé entrega ona oan sira atu haklaken Na’i Maromak nia Evanjelu,” nia hato’o.

Serimónia ordenasaun ne’e hetan partisipasaun hosi Administradór munisípiu Viqueque, Januário Soares ‘Bolly’, Komandante Polísia Nasionál Timor-Leste (PNTL) Viqueque, João da Costa, família sira hosi Diákonu no Padre na’in-rua, inklui sarani hosi postu Viqueque Vila.

Jornalista     : Vitorino Lopes da Costa

Editora          : Julia Chatarina