Parókia Viqueque Vila selebra Padroeira Imaculada Conceição
VIQUEQUE, 08 dezembru 2023 (TATOLI)—Sarani hosi Parókia Viqueque Vila, munisípiu Viqueque, sesta ne’e, selebra loron Padroeira Imaculada Conceição ba dala-36, ne’ebé sai mahein.
Bispu Dioseze Baucau, Dom Leandro Maria Alves, hateten, selebrasaun loron ba Padroeira iha tinan-36 liubá, uma-kreda universál liuhosi Dioseze Dili haraik ba reinu rua, rai rua hanesan We’e keke no Luca nu’udar parókia ne’ebé hamahan-an, iha Na’i-Feto Imaculada Conceição, ne’ebé sarani sira agradese ba loron ne’e.
“Parókia Viqueque Vila hamahan inan feto Imaculada Conceição ida-ne’e tanba nia hanesan feto ne’ebé durante ne’e tama sai iha aldeia no suku sira hotu hodi la’o hamutuk ho ita. Nune’e, esperiénsia uluk hatudu katak ita-nia inan hanesan feto ne’ebé preokupa tebes ba ita,” Dom Leandro Maria Alves, dehan iha ámbitu selebrasaun loron Padroeira Imaculda Conceição, iha Igreja Imaculada Conceição, Tilou, sesta ne’e.
Notísia relevante : Dom Leandro Maria Alves husu krismadu Viqueque sai defensór ba Kristu
Amu Bispu konsidera, inan feto Imaculada Conceição hanesan inan ne’ebé iha sensibilidade, hatene problema no preokupasaun sira-ne’ebé sarani sira enfrenta iha ida-idak ninia moris.
“Preokupasaun ne’ebé ita hasoru, ita-nia inan maka hatene liu. Tanba ne’e, importante ba ita labele hases-an hosi ita-nia inan no konvida tama iha ita ida-idak ninia moris, bolu nia mai hamutuk ho ita no la presiza dehan mós Nia hatene ona. Maibé, Nia hatene ita-nia preokupasaun no problema sira-ne’ebé enfrenta, nia sei buka solusaun ba ita,” nia hato’o.
Dom Leandro, husu sarani Parókia Viqueque Vila atu envolve nafatin inan ba idaidak ninia moris no labele hadook-an hosi inan tanba Nia maka dalan no fó solusaun ba sarani sira -nia moris.
Durante selebrasaun, Parókia mós prepara prezente kaulu takan (sasuik tau ba feto sira-nia ulun) ne’ebé entrega ba Dom Leandro Maria Alves hodi hatuur iha estatua Imaculada Conceição, nu’udar símbulu domin hosi saran Parókia Viqueque Vila oferese Padroeira.
Parókia Imaculda Conceição iha Tilou Viqueque akumula hosi sarani suku 10 hanesan suku Luca, Bahalara Uain, Caraubalo, Uma-Uain Kraik, Maluro, Fatudere, Bibileo, Uma-Uain Leten no Uaimori.
Serimónia ne’e hetan partisipasaun hosi Administradór Viqueque, Autoridade komunitária, Madre, Padre inklui sarani sira.
Jornalista : Vitorino Lopes da Costa
Editora : Julia Chatarina
