DILI, 08 dezembru 2023 (TATOLI)-Sekretáriu Estadu Veteranu (SEV), César da Silva “Merak”, hateten, veteranu mak riin ba Timor-Leste tanba ne’e presiza kontribui ba pás no ajuda Governu hodi halo dezenvolvimentu nasionál.
“Hato’o ba membru Comité 12 Novembro ho veteranu sira hotu atu, kontribui hodi asegura pás no estabilidade iha ita nasaun ida-ne’e, hanesan mós veteranu tenke kontribui hodi fó idea lori ajuda Governu, rezolve konfrontu ne’ebé akontese iha ita-nia rain tanba veteranu mak na’in no riin ba nasaun ida-ne’e”, Merak hateten iha komunikadu ne’ebé Agência Tatoli, asesu sesta ne’e.
SEV sublina katak veteranu sira tenke asegura, fó kontribuisaun, ajuda Governu hodi lori dezenvolvimentu ba nasaun ho povu iha Timor-Leste.
“Ema hotu hakarak moris hakmatek iha ambiente pás nia laran. Labele tan moris iha situasaun ta’uk, terus, susar, no labele tan iha ema ruma mate iha tempu ida agora daudaun tanba mate liu tiha ona iha tinan 24 nia-laran, nune’e hotu ona iha tinan 1999,” Merak hateten ida-ne’e bainhira halo enseramentu ba verifikasaun dadus membru Komité 12 Novembru iha Balide, Dili.
Tanba ne’e Sekretáriu Estadu Veteranu ne’e hato’o ba kandidatu hosi munisípiu inklui Dili nian, karik balun la tuir verifikasaun, bainihira mai rekere, husu Komité 12 Novembro no ekipa verifikadór atu kontinua atende tuir regra no giaun ne’ebé estabelese ona.
Jornalista : Osória Marques
Editór : Cancio Ximenes
