DILI, 11 dezembru 2023 (TATOLI)—Reprezentante Espesiál Greater Sunrise Austrália, Steve Barcks, hateten, Austrália prefere halo estudu viabilidade foun ba konseitu dezenvolvimentu Greater Sunrise.
“Ami prefere estudu viabilidade foun. Ne’ebé Kompañia join venture sira deside ona atu halo estudu viabilidade foun ba dezenvolvimentu Greater Sunrise nian, entaun iha estudu ida-ne’e sira haree kona-ba ekonómiku viável ne’ebé mak di’ak liu bainhira atu dezenvolve iha Timor ka Darwin, ne’ebé iha juñu 2024 iha ona rezultadu,” Steve Barcks, hateten hafoin enkontru ho Primeiru-Ministru, Kay Rala Xanana Gusmão, iha Palásiu Governu, segunda ne’e.
Reprezentante espesiál Austrália ne’e konsidera, enkontru ho Xefe Governu iha pasu pozitivu.
“Reuniaun di’ak tebes ho Primeiru-Ministru, ho akompanamentu hosi Ministru Petróleu Rekursu no Minerál, ami ko’alia kona-ba progresu ne’ebé la’o daudaun ona. Enkontru ne’e ami ko’alia kona-ba pasu tuir-mai iha prosesu dezenvolvimentu Greater Sunrise, liu-liu kona-ba konseitu estudu viabilidade daudaun la’o, espera ne’e iha progresu di’ak hodi kontinua ba oin,” nia akresenta.
Notísia relevante : Negosiasaun dezenvolvimentu kampu Greater Sunrise hatudu rezultadu pozitivu
Nu’udar Reprezentante espesiál Greater Sunrise Austrália nian, haktuir katak Austrália iha kompromisu projetu ne’e atu la’o ba oin, ne’ebé tenke haree mós ba viabilidade komérsiu no ekonomia nian, maibé espera tinan oin ita iha ona desizaun hosi negosiasaun ida-ne’e.
“Ami diskute buat barak maibé atu dada pipeline mai Timor, ha’u hanoin sedu liu atu ko’alia maibé ami diskute buat barak, no sei iha update iha tempu badak,” nia tenik.
Estadu Timor-Leste liuhosi Timor GAP, E.P hola parte ona iha konsórsiu Greater Sunrise, ho partisipasaun maioria reprezenta 56,56%, Woodside (operadora) 33,44% no Osaka Gas 10%.
Jornalista : Antónia Gusmão
Editora : Julia Chatarina
