DILI, 11 dezembru 2023 (TATOLI)–Institutu Kualidade Timor-Leste (IQTL, sigla portugés), konsidera serbisu ne’ebé peskizadór hosi Institutu Politékniku Betanu (IPB) deskobre ba na’an importasaun ne’ebé hatudu kontamina maka’as ho formalin ne’e bele reforsa instituisaun ninia serbisu iha tinan oin.
Vogal II Asuntu Tékniku Departamentu Meteorolojia no Normalizasaun, Mário Valente Alves, hateten inisiativa ne’e bele ajuda sira harii institutu kualidade di’ak liután tanba sira-nia serbisu rasik mós iha lejizlasaun ne’ebé fó dalan atu haree liu formalin ne’ebé kontein iha produtu ne’ebé espalla iha territóriu laran, liu-liu ba ema sira ne’ebé konsumu.
“Relasiona ho deskobrementu ne’ebé peskizadór hosi Institutu Politékniku Betanu (IPB) deskobre foin lalais, ne’e serbisu di’ak atu fó hanoin ba IQTL atu reforsa serbisu sira ba iha tinan oin, tanba IQTL mós tau importánsia ba situasaun sira ne’e,” Mário Valente Alves, dehan ba Agência Tatoli, iha ninia knaar fatin, Timor Plaza, segunda ne’e.
Notísia relevante : IQTL adia hatama mákina teste produtu kualidade unidade tolu
Ho situasaun hirak ne’e maka institutu ne’e iha hanoin atu estabelese laboratóriu, ne’ebé daudaun iha faze preparasaun no liuhosi serbisu IQTL mós halo ona koordenasaun ho laboratóriu hosi nasaun viziñu hanesan Indonézia liuhosi Badan Pengawas Obat dan Makanan (BPOM) no Austrália halo teste hahán ne’ebé kahur ho formalin sira maibé ida-ne’e só bele lori de’it amostra sira hodi halo teste iha ne’ebá.
“Bá oin ita sei halo esforsu atu serbisu hamutuk ho instituisaun sira ne’ebé halo peskiza ba formalin atu foti dadus hafoin halo teste planu sira ne’e no ita tau hotu ona Orsamentu Jerál Estadu 2024, ne’ebé ita prevee $900.000 hosi orsamentu ne’e maioria ba serbisu tékniku nomós planu sei sosa tan ekipamentu laboratóriu ba servisu administrasaun no seluk tan,” nia informa.
Jornalista : Arminda Fonseca
Editora : Julia Chatarina
