DILI, 11 dezembru 2023 (TATOLI)–Institutu Kualidade Timor-Leste (IQTL, sigla portugés) adia hatama mákina unidade tolu hodi halo teste ba produtu kualidade.
“Ha’u hanoin loos duni, tuir planu fulan ida-ne’e ami atu hatama mákina item tolu ba teste kualidade produtu hanesan bee, mina nuu no kafé, maibé ami adia ba tinan oin tanba laboratóriu ne’ebé atu tau sasán, daudaun ne’e sei halo hela etapa reabilitasaun ne’ebé seidauk ramata,” Vogal II Asuntu Tékniku Departamentu Meteorolojia no Normalizasaun, Mário Valente Alves, informa ba Agência Tatoli, iha ninia knaar fatin, Timor Plaza, segunda ne’e.
Objetivu adia ba tinan oin tanba sasán sira ne’e sensitivu no presiza tau iha laboratóriu ne’ebé tenke di’ak.
Notísia relevante: Tinan ne’e, IQTL,I.P sei sosa mákina teste kualidade produtu item tolu
Laboratóriu ne’ebé IQTL prepara ona lokaliza iha Bebora, ne’ebé tuir informasaun hosi empreza ne’ebé halo reabilitasaun ba laboratóriu ne’e, to’o loron 15 dezembru ne’e foin atinje 60% ba 70%.
Orsamentu ba reabilitasaun laboratóriu liuhosi prosesu konkursu ho montante $90.000.
Jornalista : Arminda Fonseca
Editora : Julia Chatarina
