VIQUEQUE, 11 dezembru 2023 (TATOLI)—Organizasaun Naun Governametál (ONG) lokál, Fundasaun K’nua Haberan Komunidade (KHC), segunda ne’e, iha ámbitu selebrasaun kampaña loron 16 ativizmu, loke kompetisaun diskursu públiku durante loron-ida ba estudante sekundáriu sira iha munisípiu Viqueque ho tema ‘hapara violénsia hasoru feto no labarik sira’.
Diretór fundasaun KHC, Agusto Pinto, informa, atividade ne’e ho objetivu atu hasa’e konsiénsia no koñesimentu estudante sira hodi hapara violénsia hasoru feto no labarik sira iha Timor-Leste.
“Hosi komemorasaun ida-ne’e, ami hakarak hasa’e abilidade estudante sira-nian atu nune’e sira bele iha abilidade hodi halo prevensaun violénsia bazeia ba jéneru iha família ida-idak, eskola no sosiedade. Tanba ne’e maka motiva ami hodi realiza komemorasaun loron 16 ho atividade kompetisaun,” Diretór hateten iha resitu Eskola Ensinu Sekundáriu Jerál (ESJ) Kalixa, Beobe.
Notísia relevante : KHC-PERMATIL halo prátika konservasaun bee iha foho lolon aldeia Maroman Viqueque
Fundasaun ne’e kria formasaun ba eskola sekundária haat ne’ebé foka liu ba diretu domin, respeitu, relasaun inklui hamenus violénsia kontra feto no labarik.
“Ohin ami kontinua loke diskursu públiku ba eskola sekundáriu sira hanesan estudante hosi Kalixa no Sekundáriu Filiál Santo Estevão Luca, ne’ebé kada eskola ida reprezenta estudante na’in-ida. Estudante sira maka prepara rasik materiál diskursu nian,” nia akresenta.
KHC prepara prémiu ba manán-na’in sira, ne’ebé klasifikasaun dahuluk hetan osan $150, daruak $100, datoluk $50.
Tuir Diretór, komemorasaun ne’e atu relembra prosesu luta independénsia Timor-Leste ne’ebé envolve feto atu hanoin filafali kontribuisaun feto nian iha tempu rezisténsia.
“Komemorasaun ida-ne’e atu relembra filafali ita-nia pasadu ba luta libertasaun hosi inan feto sira ne’ebé fó kontribuisaun. Nune’e, agora ita hetan ona vitória ukun rasik-an. Tanba ne’e mane presiza halo reflesaun atu hapara violénsia hasoru feto no labarik sira,” nia tenik.
Iha fatin hanesan, Estudante Eskola ESJ Kalixa, Nefifania Amaral Tilman, sente orgullu bele partisipa iha kompetisaun hodi eleva kapasidade no koñesimentu tanba hanesan oportunidade di’ak ba estudante sira.
“Ha’u sujere ba oin fundasaun KHC bele realiza atividade kompetisaun sira hanesan ne’e ba estudante sira atubele halo prevensaun ba violénsia sira iha Viqueque,” nia dehan.
Kompetisaun diskursu públiku hetan partisipasaun hosi Servisu Sekretaria Estadu Igualidade (SEI) Viqueque, Autoridade lokál, Polísia Nasionál Timor-Leste (PNTL) Viqueque, estudante no abitante sira iha postu Viqueque Vila.
Jornalista : Vitorino Lopes da Costa
Editora : Julia Chatarina
