iklan

NASIONÁL, DILI, HEADLINE, SOSIEDADE SIVĺL

KSTL husu PN ratifika konvensaun kona-bá hakotu violénsia-asédiu iha servisu fatin

KSTL husu PN ratifika konvensaun kona-bá hakotu violénsia-asédiu iha servisu fatin

Konfederasaun Sindikatu Timor-Leste (KSTL) hatama karta Petisaun ba Parlamentu Nasionál hodi tau importánsia ba hasa’e saláriu mínimu traballadór sira-nia sa’e ba $200. Imajen Tatoli/Nelson de Sousa.

DILI, 11 novembru 2023 (TATOLI) – Prezidente Konfederasaun Sindikatu Timor-Leste (KSTL),Almerio Vila Nova, husu ba Parlamentu Nasionál atu ratifika konvesaun Organizasaun Internasionál Traballu ho númeru 190 hamutuk ho rekomendasaun 206 kona-bá eliminasaun violénsia no asédiu iha mundu trabalhu nian.

Prezidente Konfederasaun Sindikatu Timor-Leste (KSTL), Almero Vila-Nova. Imajen Tatoli/Nelson de Sousa.

“Ami KSTL hamutuk ho organizasaun sindikatu traballadór hamutuk hakarak ko’alia maka’as liu no husu ba Parlamentu Nasionál atu halo ratifikasaun ba Konvesaun númeru 190 ne’ebé ko’alia kona-bá hakotu violénsia no asédiu iha mundu traballu. Kontinua luta ba revizasaun Salariu Minimu”, dehan Prezidente KSTL ne’e liuhosi Konferensia Imprensa iha Largo Lecidere-Dili.

Notísia relevante:KSTL husu Governu prioritiza revizaun saláriu mínimu ba traballadór

Prezidente KSTL ne’e hato’o deklarasaun ne’e bainhira komemora loron 16 ativizmu ho longa marxa no husi sede KSTL Bemori liu Parlamentu Nasionál to’o iha Largo Lecidere. Tema ba komemorasaun ne’e mak “Ratifika Konvensaun 190 no luta ba Igualdade remunerasaun liu husi halo revizaun ba saláriu minimu”.

Nia dehan ratifikasaun no revizasaun ba saláriu minimu mak Governu no Parlamentu Nasionál konsege halo ne’e hanesan fó prezente ida iha tinan foun atubele dignifika moris di’ak traballador sira.

“Problema saláriu mínimu la’o dadauk iha ita nia rai ne’ebé la justu hodi dignifika moris traballadór no nia familia, tanba ne’e ita mak lori atensaun ba ita nia Governu no Estadu urjentemente aprova no reve proposta dekretu saláriu  mínimu”, nia sujere.

Tuir dadus iha tinan ne’e KSTL rejista traballador sira  ne’ebé hetan violénsia no asédiu iha servisu fatin hamutuk 14.

Iha fatin hanesan, Reprezentante OIT, Margaret Araújo husu ba traballador sira atu lalika tauk hodi aprezenta keixa, bainhira hetan violénsia no asédiu iha servisu fatin.

“Se buat ruma akontese ba ita bo’ot sira labele nonok tenke ko’alia sai liuliu asuntu violénsia no asédiu”, nia fó hanoin.

Konvensaun OIT númeru 190 no rekomendasaun 206 kona-bá eliminasaun violénsia no asédiu iha mundu servisu ne’ebé  foka liu ba asuntu violénsia bazeia ba jeneru, violénsia doméstika, violénsia parseiru intimu ho prinsípiu fundamentál husi konvensaun nian ba protesaun no prevensaun, orientasaun, formasaun no sensibilizasaun.

Konvensaun númeru 190, rekoñese ema hotu nia direitu ba mundu trabalhu ida ne’ebé livre husi violénsia no asédiu inklui violénsia no asediu bazeia ba generu no rekoñese katak violénsia no asediu iha mundu trabalhu nian bele konsidera hanesan violasaun ka abuzu ba direitu umanu.

Konvensaun rekoñese mós katak violénsia no asédiu sai ameasa ida ba igualdade oportunidade ne’ebé inaseitavel no inkompativel ho traballu desente.  Konvensaun ne’e fó rekoeseimentu katak importansia husi kultura ba traballu ne’ebé bazeia iha respeitu malu no iha dignidade umana hodi prevene violénsia no asédiu.

Tanba violénsia no asédiu iha mundu traballu nian afeta ema nia saúde psikolojika, fizíka no seksuál, ema nia dignidade no ambiente familiár no sosiál.

Violénsia no asédiu afeta mós kualidade husi servisu públiku no privadu no bele impede ema partikularmente feto sira atu iha asesu permanese no atu avansa iha merkadu traballu.

Alende ne’e, violénsia no asédiu inkompativel ho promosaun empreza sustentavél no lori impaktu negativu ba organizasaun traballu, ba relasaun iha servisu fatin, ba trabalhador nia empeñu, ba empreza nia reputasaun no produtividade.

Nune’e, Konvensaun ne’e konsidera oportunu, relevante, forte no prátika no hanesan oportunidade ida hodi define futuru ba traballu bazeia ba dignidade no respeitu, livre husi violénsia no asédiu.

Notísia relevante:KSTL komemora loron-16 ativizmu kontra violénsia bazeia ba jéneru

Jornalista: Jesuina Xavier

Editór        :  Florencio Miranda Ximenes

iklan
iklan

Leave a Reply

iklan
error: Content is protected !!