Autoridade Bobonaro sei forma ekipa fiskaliza projetu PNDS la’o atraza
BOBONARO, 12 dezembru 2023 (TATOLI) – Autoridade Munisípiu Bobonaro (AMB) iha sei forma ekipa hodi halo fikalizasaun ba projetu hosi Programa Nasionál Dezenvolvimentu Suku (PNDS) ne’ebé durante ne’e ninia implementasaun la’o atraza no balu abandona hela.
Prezidente Autóridade Munisípiu Bobonaro, Ernesto de Oliveira Barreto, foti medida ne’e bazea ba orientasaun hosi Primeiru Ministru, Kay Rala Xanana Gusamo, katak iha loron 31 fulan-dezembru 2023 molok tama ba tinan foun 2024 projetu PNDS hotu-hotu, liuliu konstrusaun Uman Naroman ba Povu (UNP) faze daruak tinan 2022 tenke konklui.
Notísia relevante:PNDS Bobonaro menus rekursu umanu kontrola projetu
“Tempu ne’e badak ba ita, ne’e problema boot ida mai ita, ohin ha’u koordena ona ho diretór PNDS, sira sei ba Dili, fila mai ami sei forma ekipa ida atu ba postu neen ne’e, ami sai loron ida de’it, maizumenus to’o 31 dezembru ne’e projetu sira-ne’e bele konklui ka lae? se la konklui karik, maizumenus bele atinje ona persentajen hira,” nia hateten iha salaun administrasaun munisipál Bobonaro, segunda ne’e.
Eis administradór postu administrartivu Boobonaro ne’e informa, IX Governu sei la kansela programa UNP, maibé tanba orsamentu 2021 hamutuk milaun $2 no 2022 milaun $3 seidauk ezekuta.
“Governu labele fó tan, tanba ne’e mak sei trava, halo hotu lai mak foin ita bele hare fila-fali, ne’ebé issue ida dahan governu kansela UNP ne’e laloos, ita labele politiza sasán sira-ne’e, tanba governu ida tún ida sa’e mós, ninia objetivu serbí ba rai no povu ida-ne’e,” nia katak.
Nia fó-sai katak, to’o oras ne’e projetu PNDS regulár tinan 2021 nia mós balu seidauk konklui.
Nia rekoñese projetu hirak-ne’e ladún la’o ho di’ak, parte ida falla hosi koordenasaun servisu xefe suku sira ho autoridade munisípiu Bobonaro la másimu.
“Fallansu ne’e dezde uluk, tanba sira-nia servisu ne’e direita, dalaruma prezidente autoridade ladún akompaña, tanba ne’e projetu 2021 mai to’o agora la hotu ne’e,” nia argumenta.
Tuir dadus ne’ebé Tatoli asesu, durante mandatu tinan 10 hosi diretór PNDS munisípiu Bobonaro sesante, Paulino Viegas Tilman, konsege implementa ona projetu hamutuk 1,922. Hosi totál ne’e 1,120 finaliza ona no falta 799 mak sei implementa hela hanesan UNP 2022, Rezilénsia Komunitáriu no Rekuperasaun Ekonómiku (RKRE) II no projetu bee-moos adisionál.
Notísia relevante: PAM Bobonaro sei orienta APA neen fiskaliza projetu PNDS
Jornalista: Sérgio da Cruz
Editór: Evaristo Soares Martins
