COVALIMA, 12 dezembru 2023 (TATOLI) – Komisaun Reguladora Arte Marsiál (KRAM) no sub KRAM Covalima halo fiskalizasaun bá fatin treinamentu Grupu Arte Marsiál (GAM) nian iha postu administrativu Maucatar, Zumalai, Suai no Tilomar, iha Covalima.
Rezultadu fiskalizasaun iha tereñu hatudu katak treinadór ladún iha responsabilidade, lakohi koolabora no obedese ba autoridade, liuliu ba KRAM, sub KRAM no PNTL iha suku no postu administrativu sira.
Prezidente KRAM, Octávio da Conceição, informa Governu liuhusi Ministériu Juventude, Arte no Kultura (MJDAK) no Ministériu Interiór (MI), Komandu Jerál PNTL no Komandu PNTL munisípiu halo fiskalizasaun bá fatin refere durante loron 90 bazeia ba rezolusaun númeru 45/2023, 10 novembru.
“Ami halo fiskalizasaun bá fatin treinamentu no sentru eskola ne’ebé pratika arte marsiál iha postu administrativu haat ne’ebé balun prienxe ona kritéria segundu diretiva no balun la prienxe kritériu”, Octávio da Conceição hatete iha Tilomar, ohin.
Tuir rezolusaun númeru 45/2023, KRAM halo fiskalizasaun durante loron 90 no sei aprezenta relatóriu bazeia ba fiskalizasaun no lei númeru 5/2017.
GAM sira atu kria fatin treinamentu tenke preinxe kritériu hanesan fatin treinamentu nia naran, responsavel fatin treinamentu iha sede, kada sede tenke iha treinadór na’in-lima, iha sertifikadu, totál membru prátika arte marsiál ho idade entre 6 no 15 no iha manuál ba formasaun.
Aleinde ne’e tenke iha planu ba treinamentu, oráriu ba treinu, ekipamentu ba treinu, iha karta aseitasaun husi organizasaun GAM ba sira-nian treinadór, karta autorizasaun husi autoridade lokál, karta deklarasaun na’in ba rai no karta aseitasaun inan no aman orienta nia oan bá treinu.
Depois halo fiskalizasaun bá fatin treinamentu GAM sira, KRAM sei aprezenta relatóriu hodi rekomenda ba Governu atu foti desizaun liuhusi Konsellu Ministru iha fulan-abríl 2024.
Rekorde katak, tuir rezolusaun Governu númeru 45/2023, 10 novembru, determina ona suspensaun kona-ba ensinu aprendizajen no prátika arte marsiál ho adosaun medida hodi asegura orden públika. Suspensaun ne’e halo tanba akontese insidente foin lalais iha fatin ketak-ketak iha territóriu, ne’ebé envolve elementu arte marsiál sira ne’ebé pertense ba grupu refere.
Totál inisidente 54 ne’ebé rejista mak ema sira-ne’ebé mate hamutuk na’in-haat no kanek todan na’in-26 ho tan danu ka estragu ba sasán hanesan uma 21 no veíkulu (karreta no motór) sanulu.
Notísia relevante: KRAM disemina matadalan lima ba GAM iha Covalima
Jornalista: Celestina Teles
Editora: Maria Auxiliadora
