DILI, 12 dezembru 2023 (TATOLI) – Ministériu Edukasaun (ME) promete sei rekruta profesór sira ne’ebé mak kualidade, nune’e garante prosesu aprendizajen ida ho adekuada ba estudante sira hodi lori susesu ba sira-nian futuru.
Ministra Edukasaun, Dulce de Jesus, hatete estudante sira atu hetan ensinu ida ho kualidade tenke mai husi profesór ne’ebé preparadu. Aleinde ne’e, iha tinan lima nia laran sei tau mós atensaun ba kondisaun eskola sira hotu iha territóriu laran tomak.
Tanba ne’e, ministériu bolu ona atensaun ba timoroan hotu ne’ebe iha interese boot hakarak enkaixa aan iha vida edukadór tenke prepara aan ho didi’ak komesa agora. ME iha ona planu atu rekruta profesór ne’ebé iha kualidade hodi responde ba nesesidade estudante sira-nian iha nivel ensinu báziku, sekundáriu jerál no tékniku vokasionál.
“Ba profesór sira ne’ebé maka iha mehi atu sai manorin, kontinua hein informasaun sira husi Ministériu Edukasaun bainhira anunsia vaga ruma ita-boot sira bele submete dokumentu atubele tuir teste, nune’e bele tama iha bolsa kandidatu hodi bele hetan edukasaun ida adekuada atu lori estudante sira sai mellór klasifikadu barak liu”, governante ne’e afirma iha ámbitu fó sai rezultadu ezame nasionál iha Vila Verde, ohin.
Dulce de Jesus salienta katak rezultadu ezame nasionál ne’e mós sai sasukat atu hatene estudante ida-idak nia kualidade no sei ajuda eskola sira bele halo serbisu di’ak liután.
Ministériu Edukasaun sei kria kondisaun, iha tinan oin, hodi hatán ba nesesidade estudante sira liuhusi kolokasaun profesór sira bazeia ba nesesidade ne’ebé eskola presiza atu ajuda estudante sira bele hetan aprendizajen ida di’ak.
“Maneira atu hadi’a kondisaun hodi garante kualidade ba estudante sei bazeia ba desizaun husi rezultadu ne’ebé ekipa enumeradór sira rekolla ona iha terrenu. Signifika eskola ida maka ninia númeru profesór barak liu sei transfere fali ba eskola ne’ebé peresiza, nune’e bele apoia prosesu aprendizajen ho di’ak. Nune’e, ministériu bele halo fali rekrutamentu bazeia ba nesesidade ne’ebé eskola presiza”, realsa.
Tuir planu, Ministériu Edukasaun sei halo rekrutamentu ba profesór pur volta rihun iha 2024.
Notísia relevante: ME planeia rekruta profesór 1.000 iha tinan 2024
Jornalista: Tomé Amado
Editora: Maria Auxiliadora
