Membru Polísia tiru kanek joven ida iha área Parókia Viqueque
VIQUEQUE, 12 dezembru 2023 (TATOLI)—Membru Polísia Nasionál Timor-Leste (PNTL) Eskuadra Viqueque, tersa ne’e, maizumenus tuku 17:00 lorokraik, tiru kanek joven ida iha parte ain loos, ne’ebé akontese iha área Parókia Viqueque, Vila Antiga, postu Viqueque Vila.
Vítima ne’ebé hetan tiru ho naran Jainito da Silva, hosi aldeia Raila’a, suku Nahareka, postu Ossu, daudaun ne’e hanesan estudante iha Eskola Ensinu Sekundáriu Jerál 04 Setembru Viqueque Vila, klase 3, no atuál hela iha postu Viqueque Vila.
Vítima nia inan, José Fina da Silva, konta tuir, hafoin hetan tiru, família telefone ba Ambulánsia hodi transporta vítima bá ospitál hodi halo tratamentu ba kanek.
“Ha’u ohin bá sosa modo iha Venilale, ha’u fila mai lorokraik ne’e to’o iha uma, ha’u haree ha’u-nia oan toba hela. Joven sira parte Boromatan mai tuda ha’u-nia maun nia uma no tolok ha’u-nia maun. Nune’e, ha’u-nia oan sente ladi’ak tanba tolok, nia sai bá haree, ema ida provoka tuda uma halai hotu. Depois Polísia kaer tiha ha’u-nia oan tebe monu tiha maka tiru pistol ba nia kelen parte loos, tiru borus,” José Fina da Silva, hateten iha Ospitál Internamentu Viqueque Vila, tersa ne’e.
Notísia relevante : Vítima hetan tiru iha Baucau halo hela tratamentu iha HNGV
Nia dehan, família konsidera aktu ne’e ladi’ak tanba husik tia maka tiru filafali, loloos kaer ona bele lori bá Eskudra hodi halo investigasaun la’ós uza arma tiru.
“Aktu oknum PNTL ida tiru ha’u-nia oan, ami sente la justu. Akontesementu tuda malu iha área merkadu Viqueque Vila ne’e la’ós problema ohin de’it, maibé akontese loron PNTL haree hela. Ida ha’u-nia oan sai bá maka tiru. Ami la satisfaz ho aktu sira-ne’e, oknum membru PNTL ne’e ha’u koñese ho naran inisiál L,” nia akresenta.
Iha fatin hanesan, Médiku Internamentu, Maria Jeremia, relata, família lori pasiente Jainito da Silva to’o iha sala emerjénsia tuku 18:00, ne’ebé hetan tiru borus iha parte ain loos leten ho kanek 1,5 cm, ho profunidade 26,5 cm. Nune’e kanek parte oin suku pontu tolu no parte kotuk suku pontu tolu.
“Depois tratamentu hotu, pasiente ko’alia ba ami oin halai maibé moras ladún grave. Kanek ida-ne’e ladún grave tanba raan sai oituan, maibé ami sei tranfere ba Ospitál Referál Baucau hodi hasai raiu-x, nune’e agora ami tenke halo transferénsia pasiente atubele hatene di’ak liután. Daudaun ne’e kondisaun atuál pasiente di’ak,” nia relata.
Iha fatin ketak, Komandante PNTL munisípiu Viqueque, Superentendete João da Costa, hateten, parte Polísia sei buka hatene motivu akontesimentu.
“Ami sei halo identifikasaun maka ita foin bele hatene loloos motivu akontesimentu ida-ne’e. Prosesu la’o daudaun no ekipa investigasaun sei rekolla dadus hosi akontesimentu,” nia tenik.
Tuir oberservasaun jornalista Agência Tatoli iha sala emerjénsia, ota katak PNTL investigasaun rekolla dadus hosi vítima no sei hein vítima bainhira kondisaun di’ak sei halo invetigasaun kle’an ba akontesimentu ne’e.
Iha parte seluk, família sira kontinua akompaña vítima iha sala emerjénsia Internamentu postu Viqueque Vila no hein karta transferénsia hosi médiku sira. Enkuantu situasaun atuál iha fatin akontesmentu área Parókia Viqueque Vila la’o hakmatek.
Jornalista : Vitorino Lopes da Costa
Editora : Julia Chatarina
