DILI, 12 dezembru 2023 (TATOLI)–Prezidente Repúblika (PR), José Ramos Horta, ofisializa Embaixadór foun na’in-neen liuhosi serimónia fó pose ne’ebé realiza iha Palásiu Prezidensiál, Bairru-Pité, tersa ne’e.
Embaixadór foun na’in-neen sei formalmente aprezenta sira-nia kredensiál bainhira sira hahú sira-nia mandatu iha nasaun sira ne’ebé deside ona sira.
“Nasaun sira ita-nia Embaixada dezigna ba ne’e importante ba Timor Leste. Maski nasaun balun seidauk, maibé importante mós ba Timor-Leste no nasaun sira seluk tempu tuir mai sei akredita Embaixada Timor-Leste nian. Embaixadór Timor-Leste iha rai li’ur, ne’e reprezenta Xefe Estadu, reprezenta Estadu, Governu no nasaun,” Prezidente Repúblika, hateten, bainhira fó pose ba diplomata na’in-neen.
Notísia relevante : PR Horta kondekora Embaixadór Tailándia ho medalla ordem de Timor-Leste
Embaixadór sira ne’ebé foin hetan nomeasaun sei substitui Embaixadór atuál sira ne’ebé ramata sira-nia funsaun iha tinan ida-ne’e hanesan, Dionísio da Costa Babo Soares nu’udar Reprezentante Permanente foun Timor-Leste ba Nasaun Unida substitui Carlito Nunes.
António da Conceição nu’udar Embaixadór Timor-Leste ba Repúblika Indonézia substitui Filomeno Aleixo da Cruz. Enkuantu, Maria Ângela Guterres Viegas Carrascalão nu’udar Embaixadora Timor-Leste ba Repúblika Federal Brazíl substitui Olímpio Branco.
Alexandre Vital da Cruz Araújo Tilman nu’udar Embaixadór Timor-Leste ba Repúblika Singapura subtitui Natália Carrascalão. Nune’e mós, Filomeno Aleixo da Cruz nu’udar Embaixadora Timor-Leste ba Repúblika Demokrátika Povu Laos substitui Maria Renata de Jesus no ikus liu, Cheloé Tilman Dindo nu’udar Embaixadora Timor-Leste ba Santa Sé substitui Juvita Barreto Gonçalves.
Xefe Estadu subliña, Embaixadór ho funsionáriu sira tenke hatudu seriedade ho dedikasaun atu hala’o relasaun ho nasaun ne’ebé Timor-Leste nia Embaixada koloka ba. No Embaixadór sira tenke koloka prioridade nasaun atu hala’o relasaun multilaterá no bilaterál.
Xefe Estadu iha esperansa katak diplomata sira ne’e sei hatudu prestasaun servisu di’ak atu fó susesu ba nasaun.
Iha biban hanesan, Vise-Ministra Asuntu ASEAN, Milena da Cosra Rangel, informa, mandatu ba diplomata foun to’o tinan-tolu no bele estende depende nesesidade.
“Prezidente Repúblika fó pose ba ita-nia Embaxadór na’in-ne’e tanba Embaixadór ne’ebé iha nasaun sira ne’e besik ona atu fila tanba mandatu ramata, tanba ne’e nomea fali atu ba priense fali vaga Xefe Misaun Embaixadór sira-nia iha nasaun sira ne’e,” nia tenik.
Jornalista : Antónia Gusmão
Editora : Julia Chatarina
