Servisu Edukasaun Viqueque enkoraja inan aman suporta oan sira bá eskola
VIQUEQUE, 12 dezembru 2023 (TATOLI)—Reprezentante Servisu Edukasaun munisípiu Viqueque, Marcos Sarmento, enkoraja inan aman sira atu suporta oan bá eskola tanba oan sira maka futuru nasaun nian.
Marcos Sarmento hato’o asuntu ne’e bainhira partisipa iha serimónia graduasaun ba dala-hitu Ensinu Pre-Eskolár (EPE) Maria Lobato, ba finalista tinan letivu 2023, hamutuk na’in-27, iha Raitahu, suku Uma-Uain Kraik, postu administrativu Viqueque Vila, munisípiu Viqueque.
“Ohin estudante Ensinu Pre-Eskolár hosi inísiu gradua maka ida-ne’e, hafoin hetan baxelaratu, lisensiatura, mastradu no doutoramentu. Graduasaun ida-ne’e hanesan atu motiva estudante sira hodi alkansa ba oin, maibé atu atinje mehi sira-ne’e, inan aman nafatin fó koranjen ba oan sira hodi suporta sira bá eskola. Se inan aman la preokupa oan sira, difísil sira bele susesu,” Reprezentante Servisu Edukasaun munisípiu Viqueque, hato’o iha ninia diskursu.
Notísia relevante : INFORDEPE no UNTL deside ona kalendáriu graduasaun estudante finalista 2.576
Nia konsidera, edukasaun naun formál hosi inan aman mak 75% no edukasaun formál iha eskola maka 25%, nune’e tenke nafatin akompaña oan sira durante prosesu estudu tanba nasaun ne’e presiza ema matenek.
“Edukasaun naun formál iha ne’e importante, ho persentajen 25%, tanba ne’e inan aman sira nafatin motiva oan sira no hanorin sira iha uma. Aleinde ne’e, ha’u agradese ba estudante nia inan aman sira ne’ebé durante ne’e fó kontribuisaun ba Ensinu Pre-Eskolár ida-ne’e hodi fó graduasaun ba estudante sira,” nia akresenta.
Iha fatin hanesan, Reprezentante Xefe suku Uma-Uain Kraik, Roberto Soares dos Reis Araújo, hateten, estudante sira hahú simu graduasaun iha EPE no kontinua ba oin to’o iha banku universiáriu, tanba ne’e presiza akompañamentu.
“Ha’u husu inan aman hodi motiva estudante sira hodi sira bele esfosu-an bá eskola. Banihira inan aman sira la preokupa oan sira, sira mós lakohi bá eskola, dalabarak ida-ne’e akontese. Tanba ne’e, ha’u nu’udar autoridade fó hanoin atu kompaña oan estudu atu sira labele abandona eskola, karik oan sira la bá eskola tenke fó hanoin didi’ak,” nia apela.
Koordenadora Eskola EPE Maria Lobato iha Raitahu, Merlinda Simões Soares, relata, estudante iha eskola ne’e hamutuk na’in-63, kompostu hosi grupu A hamutuk 32 hosi tinan 3 to’o 4 seidauk finalista no daudaun finalista grupu B hamutuk na’in-31, maibé na’in-27 hetan graduasaunn enkuantu na’in-haat la kontinua eskola.
“Durante ne’e ami hanorin estudante EPE Maria Lobato no bainhira gradua ona ami entrega fali ba ensinu báziku maka kontinua hanorin ita-nia oan,” nia salienta.
Estudante hamutuk 63 fahe ba turma A na’in-32 no turma B na’in-31 mak hetan graduasaun ona no profesór iha na’in-rua.
Estudante finalista Eskola EPE Maria Lobato, Silvia, agradese ba inan aman inklui manorin sira ne’ebé durante ne’e akompaña no hanorin to’o hetan graduasaun.
“Ami estudante agradese ba ami-nia inan aman no profesora sira-ne’ebé durante ne’e hanorin ami ho matéria sira,” nia tenik.
Serimónia graduasaun ne’e partisipa hosi Autoridade lokál, inan aman hosi estudante finanlista inklui profesór sira iha Raitahu.
Jornalista : Vitorino Lopes da Costa
Editora : Julia Chatarina
