VIQUEQUE, 13 dezembru 2023 (TATOLI)—Estudante finalista hamutuk na’in-165 hosi munisípiu Viqueque partisipa teste eskrita hodi asesu ba Universidade Nasionál Timor-Leste (UNTL) no Institutu Politékniku Betanu (IPB).
“Prosesu teste ezame ba estudante sira hosi munisípiu Viqueque atu asesu ba UNTL no IPB ba tinan letivu 2024 nian, hahú horiseik no sei ramata aban (kinta). Teste ida-ne’e ba ema kbiit laek no veteranu sira-nia oan,” Diretór Servisu Edukasaun Viqueque, Domingos Brandão, informa, iha Eskola Ensinu Báziku Filiál Uaimori, Beloi, kuarta ne’e.
Komisaun teste asesu ba UNTL no IPB hamutuk ho Servisu Edukasaun Viqueque mak realiza ezame ne’e.
Notísia relevante : Finalista sira iha Covalima realiza teste eskrita asesu ba UNTL no IPB
Tuir dadus, totál estudante finalista Viqueque na’in-165, kompostu hosi UNTL siénsia teknólojia na’in-112, siénsia sosiál umanidade na’in-39 no IPB na’in-14.
“Maibé hosi númeru 165 ne’e hahú horiseik tuir teste ne’e iha estudante finalista siénsia teknolojia na’in-96 tuir teste, na’in-16 la tuir teste, enkuantu siénsia sosiál umanidade na’in-39, na’in-31 partisipa ezame no na’in-ualu la partisipa ezame,” nia relata.
Nia dehan, estudante finalista hamutuk na’in-24 ne’ebé maka la partisipa ezame asesu UNTL no IPB maka sei laiha tan oportunidade tuir ezame daruak.
“Laiha posibilidade atu tuir filafali ezame tanba ne’e regra hosi UNTL no IPB. Tanba ami koordena duni ho komisaun teste, maibé ezame segunda emisaun laiha,” Diretór tenik.
Ezame ne’e realiza durante loron-tolu, ne’ebé ekipa sei lori pontu ezame ba nasionál hodi halo koresaun hafoin fó sai rezultadu.
Jornalista : Vitorino Lopes da Costa
Editora : Julia Chatarina
