Formandu 22 hetan sertifikadu kursu lian Japaun hosi YMC-TL
DILI, 13 dezembru 2023 (TATOLI)–Asosiasaun Nasionál Juventude Cristan Timor-Leste (YMC-TL, sigla inglés), kuarta ne’e, fahe serifikadu lian Japaun ba formandu hamutuk 22, ne’ebé ramata ona kursu lian Japaun durante fulan-tolu.
Serimónia fahe serifikadu ne’e marka prezensa hosi Embaixadór Japaun mai Timor-Leste, Kimura Tetsuya no Diretór Diresaun Nasionál Empregu no Estranjeiru, João Correia Pereira.
“Objetivu ita loke kursu lian Japaun ne’e mak hakarak fasilita joven sira ne’ebé iha inisiativa hakarak apreende tanba daudaun ne’e iha oportunidade barak tebes bele ba Japaun liuhosi serbisu no bolsu estudu ho ida-ne’e ita hakarak fasilita sira, no ohin ami konsege fahe tan serifikadu lian Japaun ba formandu hamutuk 22, ne’ebé durante fulan-tolu apreende lian Japaun iha Asosiasaun Nasionál Juventude Cristan Timor-Leste,” Diretór Ezekutivu YMC-TL António da Silva, hateten, iha Tasi-Tolu, Terra Santa.
Nia dehan, YMC-TL rasik loke kursu lian Japaun hahú hosi tinan 2019 prodús ona formandu hamutuk 1.173, ne’ebé hosi númeru ne’e konsege na’in-ida ba ona serbisu iha Japaun nu’udar traballadór estajiáriu, ida agora prepara-an sei bá tan janeiru tinan oin ne’ebé no seluk mak hetan bolseiru ba eskola iha Japaun hasai mestradu.
Aleinde ne’e, dosente balun hosi Universidade Nasionál Timor-Lorosa’e (UNTL) hetan bolseiru ba tuir kursu lian Japaun iha YMC-TL hafoin ba eskola iha Japaun hasai mestradu no doutorantu.
Notísia relevante : Japaun iha kompromisu apoia TL bá hadi’ak saúde reprodutiva
Iha fatin hanesan, Embaixadór Japaun mai Timor-Leste Kimura Tetsuya, hateten, nia parte apresia ba YMC-TL, liu-liu volutáriu sira ne’ebé oferese sira-nia an ajuda joven sira apreende lian Japaun.
“Ha’u agradese ba YMC-TL tanba bele dezenvolve ona lian Japaun ba joven sira, ha’u husu YMC-TL ba kontinua hanoin lian Japaun ba joven sira ne’ebé inisiativa hakarak atu apreende tanba oportunidade bá Japaun ne’e barak tebes,” nia akresenta.
Diretór Nasionál Empregu Estranjeiru, João Correia Pereira, agradese ba Governu Japaun, liuhosi Embaixada iha Timor-Leste no JICA, ne’ebé apoiu Governu Timor-Leste iha área formasaun no setór sira seluk, liu-liu iha Sekretaria Estadu Formasaun Profisionál no Empregu (SEFOPE) asina ona akordu Memorandum Off Corporation atu haruka joven timor-oan sira ba tuir programa Technical Intern Trainer (TIT) iha Japaun.
“Ha’u enkoraja foin-sa’e na’in-22 ne’ebé ohin imi simu ona sertifikadu iha lian Japaun, atu kontinua nafatin apreende hodi prepara ba oportunidade serbisu iha futuru, tanba daudaun fatin ba apreende lian inglés, korea no japaun loke iha fatin barak, nune’e prepara-an buka antes oportunidade ne’e mai,” nia fó hanoin.
Nia fó hanoin, apreende lian la’ós de’it atu bá serbisu iha rai-li’ur hanesan Austrália, Korea Súl, no Japaun, maibé mós bele hetan oportunidade bolsa estudu iha rai-li’ur nomós serbisu iha rai-laran no iha Embaixada sira.
“Ha’u agradese ba sentru formasaun YMCA ne’ebé hanorin ona joven timor-oan sira iha lian Japaun, no husu atu dezenvolve nafatin sai di’ak liután iha futuru, hodi prepara ita-nia joven sira ba merkadu indústria ne’ebé sei mai,” Diretór apresia.
Formandu Cornélio João, kontente tebes tanba ohin loron nia bele apreende tan lian estranjeiru ida iha nia moris.
“Ha’u orgullu tebes ba ha’u-nia an tanba bele apreende tan lian Japaun, oportunidade ida ha’u sei aproveita ho di’ak bele buka serbisu bá Japaun lae teste bolsu estudu ruma tanba lian ne’ebé ha’u apreende sei fasilita ha’u,” nia salienta.
Formandu na’in-22 ne’ebé simu serifikadu ne’e kompostu hosi mane na’in-14 no feto na’in-ualu.
Jornalista : Arminda Fonseca
Editora : Julia Chatarina
