iklan

POLÍTIKA

FRETILIN prefere evita empréstimu hosi rai-li’ur

FRETILIN prefere evita empréstimu hosi rai-li’ur

Deputado FRETILIN, Joaquim dos Santos. Imajen Tatoli/Egas Cristóvão

DILI, 13 dezembru 2023 (TATOLI)—Deputadu bankada FRETILIN, Joaquim dos Santos, prefere IX Governu konstituisionál evita foti osan empréstimu hosi rai-li’ur no di’ak liu foti osan hosi fundu mina-rai investe makaas iha setór produtivu ho retornu ekonómiku sustentável.

Notísia Relevante: PN aprova proposta OJE 2024 iha faze jeneralidade ho votu a-favór 43

To’o iha tinan 2023, Timor-Leste iha ona empréstimu aprovadu hamutuk hosi emprestidór sira hanesan Banku Dezenvolvimentu Asiátiku (ADB, siglá inglés), Banku Mundiál, JAICA, AIF maiória hodi finansia infraestrutura boot sira iha Timor-Leste no empréstimu sira-ne’e komesa ona tinan 10 liu no iha tinan amortizasaun inisiál durante tinan 20 ba to’o 40’

Dezde iha tinan sira kotuk, Timor-Leste diskute hela kona-ba fundu petrolíferu ne’ebé atu mamuk, maibé IX Governu kontinua haree dívida públika nu’udar finansiamentu alternativu atu dezenvolvimentu Timor-Leste nia ekonomia liuliu infraestrutura.

“Iha livru OJE 2024 hateten, iha futuru Governu sei buka empréstimu millaun $500 ho durasaun amortizasaun durante tinan 40, atu finansia projetu infraestrutura iha petróleu no setór sira seluk hanesan edukasaun, saúde, agrikultura, turizmu no enerjía renovável. Tanba ne’e, bankada FRETILIN hanoin katak, em vez ita alternativu ho dívida atu salva fundu petrolíferu di’ak-liu ita evita dívida estranjeiru, maibé investe iha setór produtivu di’ak liu  ita gasta ho retornu ekonómiku rendimentu sustentável atu labele depende de’it ba petróleu, diversifikasaun ekonómiku importante,” Joaquim dos Santos hato’o liuhosi deklarasaun polítika iha debate proposta Orsamentu Jerál Estadu (OJE) 2024 iha faze jeneralidade ba loron daruak iha sala plenária PN, kuarta ne’e.

Tuir relatóriu paresér apresiasaun inisiál ba proposta-lei OJE 2024 hosi komisaun C trata asuntu Finansa Públika iha PN, rekomenda ba Governu prosede urjente regulasaun lei númeru 13/2011 ne’ebé aprova Rejime Dívida Públika hodi dixiplina área espesiál komplesidade, atualmente permite ba Estadu iha momentu Governu rekore modalidade finanseiru públiku ho nesesáriu salvaguarda sustentabilidade finansa públika ba jerasaun tuir mai.

 Komisaun C ninia opiniaun ho autorizasaun PN fó ba Governu hodi subskreve to’o millaun $500 dívida públika adisionál, nune’e rekomenda ba Governu mantein transparánsia iha relasaun jestaun dívida no inklui fornese informasaun detallu kona-ba utilizasaun empréstimu, projetu finansiadu no planu para pagamentu dívida previamente subskriasaun emprestimu externu foun.

Komisaun C destaka posível ‘área cinzeta’ iha relasaun autorizasaun dívida por sub-setór Estadu, nune’e rekomenda ba Governu destaka estabelese limite klaru no prosedimentu transparante ba autorizasaun dívida por sub-setór, garante akordu ho mellor prátika no ho konformidade ho lei existente.

Tuir proposta-lei númeru 4/VI(1a) Orsamentu Jerál Estadu (OJE) 2024 iha artigu 5 Dívida Públika, iha alínea 1 hateten durante tinan 2024 Governu autoriza kontrata ka emite dívida públika ho montante másimu millaun $500 ho prazu mázimu tinan 40.

Iha alínea 2 haktuir, durante 2024, aleinde konstrusaun infraestrutura konstrusaun infraestrutura estratéjika, Governu atuoriza kontrata empréstimu iha área explorasaun, refinasaun no transporte petróleu no gás no investimemtnu asosiadu, edukasaun, saúde, formasaun, agrikultura, transporte, turizmu no enérjia renovável.

Iha debate proposta-lei OJE 2024 iha faze jeneralidade loron daruak, Primeiru-Ministru (PM), Kay Rala Xanana Gusmão, rejista preokupasaun ne’e no bele hatán iha diskusaun espesialidade hodi ko’alia espesífiku liu tan.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!