iklan

POLÍTIKA

PN aprova proposta OJE 2024 iha faze jeneralidade ho votu a-favór 43

PN aprova proposta OJE 2024 iha faze jeneralidade ho votu a-favór 43

Parlamentu Nasionál (PN), liuhosi reuniaun plenária aprova proposta-lei númeru 4/VI(1a) Orsamentu Jerál Estadu (OJE) 2024 ho montante bilain $1,95 iha faze jeneralidade ho votu a-favór 43 konta 8 no abstensaun ida (1), kuarta (12 dezembru 2023). Imajen Tatoli/Antonio Daciparu

DILI, 13 dezembru 2023 (TATOLI)-Parlamentu Nasionál (PN), kuarta ne’e, liuhosi reuniaun plenária aprova proposta-lei númeru 4/VI(1a) Orsamentu Jerál Estadu (OJE) 2024 ho montante biliaun $1,95 iha faze jeneralidade ho votu a-favór 43, kontra ualu (8) no abstensaun ida (1), hosi korum iha Deputadu na’in-52.

Notísia Relevante: Aban, PN-Governu hahú debate proposta OJE 2024 iha faze jeneralidade

“Ne’ebé, debate iha jeneralidade aprovadu,” Prezidente Parlamentu Nasionál, Maria Fernanda Lay, fó sai iha sala plenária, PN.

Tuir ajenda, PN-Governu sei kontinua debate ba proposta OJE 2024 iha faze espesialidade durante loron lima hahú iha loron 14 fulan dezembru ne’e.

Iha debate espesialidade ne’e, sei diskute espesífiku ba proposta-lei OJE 2024 kada artigu.

Enkuantu, iha debate loron dahuluk ba proposta OJE 2024, Primeiru Ministru (PM), Kay Rala Xanana Gusmão, aprezenta katak Proposta-Lei Orsamentu Jerál Estadu (OJE) ba tinan fiskál 2024 ne’ebé aprezenta refltete ‘Atu harii ponte ba loron aban: Investe iha setór produtivu no iha kapitál sosiál’.

“Ami konsidera no tau iha orsamentu, objetivu estratéjiku hosi programa IX Governu Konstitusionál nian, iha pilár fundamentál rua mak hanesan setór produtivu no kapitál sosiál,” Xanana Gusmão hato’o liuhosi nia diskursu.

Xanana haktuir, orsamentu ida-ne’e nu’udar orsamentu dahuluk ba IX Governu nian, ne’ebé estabelese fundasaun ba saida mak ezekutivu sira hakarak konkretiza iha tinan-lima mai.

“Oinsá, mak sei konkretiza. Liuhosi promove investimentu prioritáriu ne’ebé bele kontribui ba konstrusaun futuru ida-ne’ebé prósperu no sustentável. Investimentu iha infraestrutura públika, iha kapasidade ba produsaun no kriasaun empregu, no iha setór ekonómiku diversifikadu, ne’ebé sei kontribui atu impulsiona ka dudu, kresimentu ekonómiku,” Xanana argumenta.

Nune’e, tuir Xefe Governu dehan, hosi pontu de vista sosiál, investimentu iha edukasaun saúde, inkluzaun, kombate ba pobreza no iha protesaun meiu ambiente terrestre no marítimu, bele dehan investimentu iha setór ho impaktu diretu ba melloria kualidade vida timoroan sira-nian no ho rezultadu ba tempu naruk.

“OJE 2024 ne’ebé ami propoin, aprezenta ninia valór konsolidadu to’o biliaun $1,95 ba Administrasaun Sentrál, Rejiaun Administrativa Espesiál Oé-Cusse Ambeno (RAEOA) no Seguransa Sosiál, no la hatama Fundu Rezerva Seguransa sosiál. Montante ida-ne’e inklui dotasaun biliaun $1,83 ba Administrasaun Sentrál millaun $60 ba deit RAEOA,” nia dehan.

Reseita Estadu ba orsamentu ida-ne’e hetan ekilibru ka tetu ho di’ak ho despeza Estadu ba setór públiku administrativu, ba administrasaun sentrál no ba sub-setór seguransa sosiál no ba RAEOA.

Entretantu, atu bele implementa medida estratéjika atu dudu setór produtivu no ba kapitál sosiál presiza duni atu halo transferénsia hosi Fundu Petrolíferu, ne’ebé aas liu Rendimentu Sustentável Estimadu (RSE), maibé halo transferénsia ida-ne’e ho hanoin atu mós prezerva nafatin integridade ba Fundu refere.

“Fundu ida-ne’e tenke sai totalmente transparente no tenke jeridu ho forma profisionál, iha ne’ebé kada dólar hosi reseita ne’ebé mai hosi rekursu petrolíferu tama iha fundu ne’e, hodi nune’e hetan garantia sustentabilidade ba jerasaun futura,” Xefe Ezekutivu afirma.

Tanba ne’e, RSE ne’ebé sei transfere sei investe iha diversifikasaun ekonómika no la’ós atu habokur despeza korrente Estadu-nian tanba Governu hatene katak levantamentu esesivu hosi Fundu Petrolíferu halo de’it atu taka défise orsamentál, hanesan akontese iha tinan hirak kotuk ne’e, nune’e mak mosu obrigasaun atu hapara tiha tendénsia ida-ne’e

“Únika solusaun ba ita-nia país mak tenke investe ho didi’ak rekursu sira-ne’e atu hakotu dependénsia ba fundu ne’ebé ha’u dehan tiha ona, tenke investe nu’udar garantia segura duni ba futura jerasaun, ba futuru ne’ebé sustentável ba país. Tanba ne’e, atu proteje fundu ida-ne’e, ita tenke investe duni. Se laiha investimentu sei laiha kresimentu no sei laiha dezenvolvimentu ekonómiku no sosiál,” Xanana hateten.

Se laiha investimentu, laiha posibilidade atu dinamiza setór produtivu, ne’ebé sei hamosu empregu no sei labele dezenvolve sidadaun saudável, kualifikadu no aptu atu kontribui ba diversifikasaun iha ekonomia, ne’ebé nesesária tebes atubele antesipa tiha ba situasaun ne’ebé fundu petrolíferu sei hotu.

Ho hanoin hirak ne’e mak Governu uza RSE ho rigór no responsabilidade atu permite estabilidade ekonómika ho di’ak, permite hetan rendimentu no kria empregu no bele hetan transformasaun ekonómika ne’ebé sei promove sustentabilidade iha ekonomia.

Proposta-Lei OJE 2024 ne’ebé Governu aprezenta ho montante konsolidadu biliaun $1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál.

Hosi montante ne’e, fahe ba kategoria saláriu no vensimentu, bens no servisu millaun $386,3, transferénsia públika millaun $589,7, kapitál menór millaun $34,2 no kapitál dezenvolvimentu millaun $411.

Orsamentu Seguransa Sosiál inklui Fundu Rezerva Seguransa Sosiál hetan alokasaun millaun $347,6.

Prevee mós ba asuntu ekonómiku millaun $788,2, protesaun sosiál millaun $467,1, edukasaun millaun $140,9, saúde millaun $66,2 no abitasaun no infraestrutura koletiva millaun $45,2.

Enkuantu, IX Governu Konstitusionál hasai verba ho valór biliaun $1,38 hosi Fundu Petrolíferu hodi aloka iha Proposta-Lei OJE 2024.

“Transferénsia ida-ne’e korresponde besik millaun $522,1 hosi Rendimentu Sustentável Estimadu (RSE) no ho valór millaun $855,54, ne’ebé liu ona RSE,” Xanana Gusmão hateten

Governu refere halo investimentu iha agrikultura, peska no pekuária, turizmu, pequena no média indústria no empreza nomós kona-ba apoiu ba inisiativa privada. Katak, sei investe iha buat hotu ne’ebé sei promove kondisaun ba moris no rendimentu ba família.

Ezekutivu mós buka atu reforsa soberania no independénsia liuhosi substitui sasán importasaun ho produsaun rai-laran rasik.

“Ba tinan 2024, Governu sei aposta iha área tolu ne’ebé krusiál atu hala’o investimentu substansiál iha infraestrutura produtiva. Ne’ebé ba dahuluk, sei haree ba setór eletrisidade, ho dotasaun millaun $165,6, ne’ebé buka reflete importánsia estratéjika atu garante fornesimentu enerjia fiável no asesível ba populasaun no ba empreza. Investimentu ida-ne’e sei kontempla 20% hosi populasaun, ne’ebé seidauk iha asesu ba rede eletríka nasionál,” Xanana dehan.

Daruak, setór konstrusaun infraestrutura ho dotasaun to’o millaun $153,5 hodi reafirma kona-ba urjénsia iha dezenvolvimentu infraestrutura no promosaun kresimentu ekonómiku.

“Ami sei reabilita no konstrui infraestrutura bázika no sei moderniza sistema água, saneamentu báziku no sistema de drenajen, liu-liu iha Dili no sei instala kabu fibra ótika atu garante asesu ba internet ho kualidade ba sidadaun hotu no kumulativamente atu fasilita kresimentu negósiu no empreendedorizmu,” nia hateten.

Datoluk, setór Petróleu no Gás Naturál ho investimentu millaun $104,2 hodi enfatiza vizaun Governu atu aproveita no otimiza rekursu naturál nasionál hodi promove dezenvolvimentu ekonómiku sustentável.

IX Governu Konstitusionál empeñadu atu estabelese baze abastesimentu ida no refinaria ida iha Kosta Súl, atu liga ba gazodutu ne’ebé mai hosi Greater Sunrise hodi nune’e bele dezenvolve indústria petrolífera nasionál ne’ebé ho buat seluk tan kria empregu ba timoroan sira.

“Ha’u hakarak fó lembra katak objetivu hosi projetu Tasi Mane mak atu kontribui la’ós de’it ba dezenvolvimentu Kosta Súl no ba indústria petrolífera rasik, maibé mós atu proporsiona ka fó impaktu ekonómiku diretu no indiretu iha país tomak hodi kaer no haluan benefísiu ekonómiku, ne’ebé mai hosi esplorasaun ba rekursu naturá Timor-Leste. Iha país ida hanesan ita-nian, sei joven no sei frájil, iha ne’ebé besik 60% hosi populasaun ho idade menus 25, presiza tebes iha korajen atu investe iha projetu, ne’ebé sei transforma ita-nia ekonomia no sei konsolida estabilidade nasionál,” nia fundamenta.

Governu nota katak Governasaun anteriór hapara tiha esforsu hotu-hotu atu alkansa no atu elabora akordu ida sobre dezenvolvimentu ba Greater Sunrise. Aleinde ne’e, IX Governu kaer filafali esforsu sira ne’e atu lori gazodutu mai Timor-Leste.

“Permite ha’u atu fó lembra dala ida-tan, ezemplu di’ak ida kona-ba dezenvolvimentu ne’ebé ita hakarak ba Timor-Leste, ne’ebé Darwin mak sei testemuña di’ak-liu. Ha’u bá serbisu iha Darwin iha tinan 1974, no fila bá iha ne’ebá iha tinan 1999, no liu tiha tinan hirak ha’u ba fali Darwin no impresionadu tebes ho dezenvolvimentu ne’ebé lalais duni iha Territóriu Norte Austrália, tanba de’it sira hahú no hala’o ona esplorasaun kampu Bayu-Undang ne’ebé loloos Timor- Leste nian,” nia haktuir.

Timor-Leste mós hakarak hetan oportunidade atu uza rekursu hodi dezenvolve Kosta Súl, hodi harii sidade foun no apoia infraestrutura.

Timor-Leste hakarak kria postu traballu besik rihun 50, postu traballu direta no indireta iha esplorasaun rekursu no iha faze konstrusaun no operasaun iha iha infraestrutura no apoiu serbisu ba projetu ne’e.

Tanba ne’e, iha orsamentu tinan 2024 hatudu mós medida estratéjika importante seluk kona-ba kresimentu ekonómiku no dezenvolvimentu país nian ba tempu-naruk hodi nune’e bele satisfaz nesesidade ne’ebé atuál no sesesidade jerasaun iha futuru.

Governu sei revee Planu Estratéjiku Dezenvolvimentu (PED 2011-2030) iha tinan 2024 hodi bele adekua planu ne’e ba Estadu no nasaundaudaun, nomós ba dinámika globál ne’ebé fó impaktu ba nasaun iha tinan ikus.

Notísia Relevante: Governu bele submete proposta OJE 2024 debate ho karáter urjénsia

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!