Grupu agrikultór Viqueque halo ona manutensaun ba tratór
VIQUEQUE, 13 dezembru 2023 (TATOLI)—Grupu agrikultór hosi postu Viqueque Vila, munisípiu Viqueque ho inisiativa halo manutensaun ba tratór boot hodi bele opera halo atividade agrikultura.
Diretór Servisu Agrikultura Viqueque, Joaquim Fernandes, hateten, daudaun ne’e iha tratór lima mak ajuda hela grupu agrikultór sira halo atividade, maibé iha problema manutensaun.
“Grupu agrikultór sira kontribui halo manutensaun ki’ik hanesan troka óleu no sosa mina. Tanba ita hatene manutensaun tratór boot ba tinan ida-ne’e seidauk iha,” Joaquim Fernandes, informa ba Agência Tatoli, iha postu Viqueque Vila, kuarta ne’e.
Nia dehan, grupu agrikultór daudaun uza hela tratór boot hodi halo atividade iha suku Uma Uain Kraik, Fatudere, Maluru no Uma-Uain Leten, maibé tanba ho limitasaun, nune’e seidauk bele uza iha postu Lacluta, Uatucarbau, Uatulari no Ossu.
“Ita mós haree katak tratór boot ne’ebé daudaun fila rai ne’e labele halai ba dook. Tanba ne’e, agora fila rai de’it iha área besik no tratór boot rua maka akompaña malu, karik ida falla, ida bele ajuda,” nia hato’o.
Notísia relevante : Servisu Agrikultura Viqueque prefere halo manutensaun tratór boot 26
Bainhira ba fila rai maka sasán ruma a’at, maka grupu agrikultór sira maka troka rasik.
“Loloos ne’e tratór boot ne’e apoia gratuita ba fila rai, maibé manutensaun tarde. Ho ida-ne’e maka grupu agrikultór hasai deklarasaun hodi apoia halo manutesaun no sosa mina hodi fila sira-nia rai, tuir kbiit ne’ebé iha,” Diretór tenik.
Grupu agrikultór no abitante sira daudaun ne’e hato’o ona proposta hamutuk 300-resin ba Servisu Agrikultura Viqueque, maibé seidauk iha resposta tanba
“Ami simu proposta barak, maibé ami seidauk bele responde tanba kondisaun tratór a’at. Antes ne’e, Ministru Agrikultura dehan tama dezembru ne’e atu halo ona manutesaun tratór, maibé to’o agora seidauk realiza, udan mós komesa monu rai,” nia salienta.
Jornalista : Vitorino Lopes da Costa
Editora : Julia Chatarina
