VIQUEQUE, 14 dezembru 2023 (TATOLI)—Anin boot no udan ne’ebé akontese iha semana ikus iha territóriu, rezulta populasaun nia uma hamutuk 28 iha Viqueque hetan estragu.
“Fenómenu La Nino iha munisípiu Viqueque hamosu anin boot no akompaña udan hodi estraga uma hamutuk 28, maibé ida-ne’e hanesan dadus provizóriu, seidauk halo verifikasaun hotu,” Autoridade Protesaun Sivil Viqueque, Matias da Silva, informa, iha postu Viqueque Vila, kinta ne’e.
Nune’e, daudaun ekipa kontinua halo identifikasaun ba vítima afetadu sira-ne’ebé maka ekipa seidauk halo verifikasaun.
Notísia relevante : Semana oin, APC distribui materiál konstrusaun ba vítima dezastre naturál Viqueque
Tuir dadus postu Viqueque Vila iha uma 20 mak a’at tanba dezastre naturál, Lacluta uma neen, Ossu uma ida no Uatulari uma ida.
“Dadus ne’e ami hetan hosi verifikasaun, ne’ebé ekipa distribui ona pakote emerjénsia ba vítima dezastre naturál. Pakote emerjénsia ne’e kompostu hosi foos, mina, dose, lona, bikan kanuru, kafé masi midar no seluk tan. Maibé materiál kontrusaun seidauk tanba sei aprezenta ba nasionál maka bele deside,” nia tenik.
Jornalista : Vitorino Lopes da Costa
Editora : Julia Chatarina
