Autoridade lokál ladún partisipa iha programa eliminasaun tuberkuloze iha Viqueque
VIQUEQUE, 14 dezembru 2023 (TATOLI)—Responsável programa eleminasaun moras tuberkuloze Viqueque, Francisco de Carvalho, nota katak, durante ne’e autoridade iha Viqueque ladún partisipa iha programa eliminasaun tuberkuloze.
“Tuir relatóriu hosi supevizasaun ekipa taskforce ba programa tuberkuloze iha munisípiu Viqueque, relata katak durante ne’e bainhira programa ne’e la’o, menus envolvimentu hosi autoridade lokál sira. Tanba ne’e, ami nafatin fó hanoin ba sira katak labele husik pesoál saúde mesak, tanba ami presiza apoia no tulun hosi líder lokál sira, atu nune’e bele deteta moras no pasiente bele hetan tratamentu sedu,” Francisco de Carbalho, hateten, iha ámbitu atividade avaliasaun programa moras tuberkuloze iha trimestre datoluk, iha salaun munisípiu Viqueque, kinta ne’e.
Nia relata, problema seluk ne’ebé ekipa taskforce identifika maka abitante balun rejeita halo tratamentu, nune’e autoridade lokál hanesan xefe suku no xefe aldeia sira tenke serbisu hamutuk ho pesoál saúde sira hodi fó hanoin ba abitante sira tanba autoridade lokál maka besik liu ba abitante, nune’e tama tinan 2024 bele elemina ona moras tuberkuloze.
“Ha’u hanoin koordenasaun no kolaborasaun entre autoridade lokál la’o di’ak. Ha’u fiar ita sei bele elemina moras tuberkuloze iha Viqueque tanba durante ha’u rasik akompaña, mákina raiu-x tama sai suku no aldeia to’o Aitana. Dezafiu seluk ne’ebé ami enfrenta maka jeografia no abitante sira-nia konsiénsia, dalaruma ita lori mákina to’o sira-nia fatin, maibé nafatin lakohi partisipa,” nia akresenta.
Notísia relevante : Administradora Fundu Globál konsidera kombate tuberkuloze presiza ema hotu nia kontribuisaun
Tanba ne’e, Responsável programa husu ba ekipa taskforce ne’ebé estabelese, kompostu hosi autoridade lokál sira, hodi hato’o mensajen ba povu hodi partisipa screening.
Nia haktuir, tempu uluk halo screening tenke transfere pasiente bá Baucau, maibé daudaun mákina iha ona munisípiu Viqueque.
Tuir dadus, hosi fulan-janeiru to’o setembru trimestre datoluk, rejista moras tuberkuloze iha sentru saúde Uatulari iha ualu, sentru saúde Ossu iha 49, sentru saúde Lacluta iha 20 no sentru saúde Viqueque Vila iha 64, ne’ebé daudaun iha ona faze tratamentu.
Sentru saúde sira seidauk aprezenta dadus trimestre dahaat nian ba Servisu Saúde Viqueque.
Ekipa ne’ebé envolve iha taskforce ba programa elemina moras tuberkuloze mak hanesan Autoridade munisipál, Komadante Polísia Nasionál Timor-Leste (PNTL) Viqueque, xefe suku no xefe aldeia inklui pesoál saúde.
Jornalista : Vitorino Lopes da Costa
Editora : Julia Chatarina
