Top

Deputada FRETILIN husu promove tais iha mundu

Inan-feton soru na’in ida aprezenta hela iha expozisaun oinsá soru Tais, sesta (25/08/). Imajen TATOLI/António Daciparu.

DILI, 14 dezembru 2023 (TATOLI)—Deputada FRETILIN iha Parlamentu Nasionál (PN), Nurima Ribeiro Alkatiri, hateten loron Nasionál Tais ne’ebé Timor-Leste selebra iha kada 14 dezembru ne’e tenke promove mós produsaun tais iha mundu.

Notísia Relevante: PN aprova projetu rezolusaun “Loron Nasionál Tais” selebra kada 14 dezembru

“Loron nasionál tais ne’e importante tebes tanba fó valór no foka ba ita-nia valór tais nian ne’ebé mundu tomak hatene ona, katak Timor-Leste nia identidade kultura mak tais. Tanba ne’e mak importante ba ita atu selebra maibé la’ós atu selebra hatais maibé halo promosaun ba iha mundu,” deputada Nurima Ribeiro Alkatiri hateten ba Agência Tatoli, iha uma fukun Parlamentu Nasionál, kinta ne’e.

Kona-ba promove produsaun tais, nia dehan, iha Parlementu Nasionál daudaun ne’e mós tau tais iha meza parlamentu nian inklui água fatin mós falun ho tais.

“Promosaun ida-ne’e mós presiza ita halo ba ita-nia populasaun sira-ne’ebé mak prodús tais nian ne’e, tanba liuhosi sira mak bele halo promosaun ne’e,” nia hateten.

Husu kona-ba xineza sira-ne’ebé daudaun ne’e imita dezeñu tais hodi halo negósiu iha merkadória, deputada ne’e dehan, ida-ne’e akontese iha ne’ebé de’it maibé orijinalidade tais Timor-Leste nian lahanesan.

“Sempre akontese nune’e, maibé ita-nia orijinalidade ne’e lahanesan no nia folin la hanesan iha merkadória,” nia dehan.

Deputada FRETILIN, Ana Bela Sávio, hateten iha loron nasionál tais ne’e Governu presiza promove tais iha mundu, nune’e bele hatudu valór no importánsia tais Timor-Leste nian.

“Tanba ne’e, ha’u sujere ba Governu atu prevee osan ba asuntu ne’e, nune’e halo promosaun ba ita-nia tais iha mundu tomak no mellora produsaun tais ne’e ba mundu,” nia hateten.

Sekretáriu Estadu Arte no Kultura, Jorge Soares Cristóvão, hateten ho loron nasionál tais ne’e Governu kontinua prezerva tais no promove liután iha mundu.

“Ita kontinua halo nia konservasaun no prezerva tais ne’e ho di’ak liután,” Governante ne’e hateten ba Agência Tatoli liuhosi entrevista eskluziva iha Parlamentu Nasional (PN), kinta ne’e.

Notísia Relevante: Membru PN husu Governu kontrola loja xineza imita dezeñu tais

Jornalista : Osória Marques

Editór        : Cancio Ximenes

Publisidade

Leave a Reply

Latest Post

error: Content is protected !!