iklan

EDUKASAUN, HEADLINE

Finalista 622 husi ISC tenke hatudu kualidade iha sosiedade

Finalista 622 husi ISC tenke hatudu kualidade iha sosiedade

Serimónia yudisium ba finalista ISC.

DILI, 14 dezembru 2023 (TATOLI) – Estudante finalista 622 husi Fakuldade Siénsia Edukasaun no Siénsia Saúde husi Institutu Superiór Cristal (ISC) realiza ona serimónia yudisium. Iha eventu ne’e, Prezidente Ezekutivu Fundasaun Cristal, Agostinho dos Santos Gonçalves, husu finalista sira tenke hatudu sira-nian kualidade atu bele haburas nafatin ISC nian naran iha sosiedade.

Agostinho Gonçalves afirma katak yudisium ne’e importante liu, tanba ida ne’e maka atu fó rekoñesimentu ba estudante sira liuhusi sira-nian dedikasaun durante estuda iha institutu superiór.

Fundadór ISC ne’e husu ba finalista sira tenke sai figura ida di’ak bainhira filafali ba serbisu hamutuk iha sosiedade nia leet, hatudu kualidade atu iha futuru bele sai líder ida ne’ebé di’ak.

“Imi hatudu ona kualifikasaun di’ak durante tinan barak estuda iha institusiun ida ne’e. Hanesan fundadór ida hakarak haree imi-nian rezultadu, tanba serimónia ida ohin ne’e la’ós ninin no rohan ba imi-nian viajen iha akadémiku, maibé atu loke espasu foun ba imi hodi kontinua aprende no estuda liután iha nivel ne’ebé tuirmai”, Agostinho afirma iha salaun Katedrál, Vila Verde, ohin.

Finalista husi Departamentu Enfermajen, Fakuldade Siénsia Saúde, Brígida Verdial Ximenes, haktuir katak hanesan figura foun ida ne’ebé sei hola parte hodi tau-matan ba ema nia vida iha área saúde nia promete sei halo esforsu atu sai ema ne’ebé profisionál hodi halo serbisu ho responsabilidade.

“Ha’u konxiente katak vida ida ne’ebé ha’u hili atu sai pesoál saúde ne’e sei hela hamutuk ho ha’u to’o mate. Tanba ne’e, husi profisaun ne’ebé ha’u hili ona, ha’u sei fó tulun ba ema hotu liuhusi asaun ne’ebé ha’u sei halo iha ha’u-nian moris tomak”, promete.

Estudante finalista husi ISC ne’e mai husi departamentu 14 inklui programa pós graduasaun. Husi Fakuldade Siénsia Edukasaun kompostu husi Departamentu Matemátika iha finalista na’in-ualu, Fízika haat, Kímika tolu, Ekonomia no Kontabilidade 18, Inglés 50, Portugés 59, Sosiologia 38, Psikolojia 12, Biolojia 22 no Informátika 16.

Husi Fakuldade Siénsia Saúde kompostu husi departamentu rua mak Enfermajen iha estudante 254, no Parteira hamutuk 89. Ba programa pós graduasaun iha área rua mak Teknolojia Edukasaun iha 17 no Jestaun Edukasaun 32.

Jornalista: Tomé Amado

Editora: Maria Auxiliadora   

iklan
iklan

Leave a Reply

iklan
error: Content is protected !!