VIQUEQUE, 14 dezembru 2023 (TATOLI)—Grupu responsável hahú implementa projetu komunitáriu halo reabilitasaun no konstrusaun infraestrutura eskola hamutuk 11 iha Viqueque.
“Aloka ona orsamentu ba kada grupu responsável sira iha tinan ne’e, ne’ebé daudaun ne’e ami haree grupu sira hahú ona implementa projetu,” Diretór Servisu Edukasaun Viqueque, Domingos Brandão, informa ba Agência Tatoli, iha ninia knaar fatin, Beloi, kinta ne’e.
Projetu komunitáriu iha Eskola Ensinu Báziku Filiál (EBF) Vila Nova Bahalara Uain, postu Viqueque Vila mosu disputa rai, maibé Autoridade lokál no Servisu Edukasaun Viqueque konsege rezolve ona, nune’e daudaun badaen sira hahú halo serbisu. Enkuantu eskola seluk laiha problema, atividade reabilitasaun no konstrusaun la’o daudaun.
“Projetu komunitáriu eskola 11 ida-ne’e balun sala rua no balun hetan sala tolu, kompleta ho eskritóriu. Orsamentu ba konstrusaun infraestrutura ha’u ladún hatene tanba orsamentu aloka direta ba grupu responsável sira-nia konta bankária, aban bainrua projetu ne’e hotu maka foin ita hatene,” nia relata.
Notísia relevante : Implementasaun projetu komunitáriu iha eskola 11 Viqueque iha faze preparasaun
Biban ne’e, Diretór husu grupu responsável sira atu serbisu ho responsável no garante kualidade, nune’e bele uza ba tempu naruk.
Eskola 11 ne’ebé sai benefisiáriu ba projetu komunitáriu mak hanesan Eskola EBF Loco-Loco lokaliza iha área rurál suku Matahoi postu Uatulari, EBF Komu-Oli, EBF Uaibua Ossu, EBF Villa Nova Bahalara Uain postu Viqueque Vila, EBF Kai-rua Lacluta, EBF Rame Ana Ossu, EBF Uma Tolu Lacluta, EBF Iraler Uatulari, EBF Osokaiua Uatulari, EBF Afaloikai Uatulari no Eskola Tékniku Kalo Heda Uatulari ne’ebe atu harii morru haleu iha eskola.
Jornalista : Vitorino Lopes da Costa
Editora : Julia Chatarina
