COVALIMA, HEADLINE

Sentru Solidariedade Sosiál implementa ona programa haat

Sentru Solidariedade Sosiál implementa ona programa haat

Diretór MSSI Covalima, Agapito Assis. Imajen Tatoli/Celestina Teles.

COVALIMA, 14 dezembru 2023 (TATOLI) – Sentru Solidariedade Sosiál no Inkluzaun Covalima implementa, iha 2023, programa haat hanesan asisténsia umanitária, halo atendimentu ba violénsia bazeia ba jéneru, asuntu defisiénsia no bolsa da mãe jerasaun foun no kondisionál.

Diretór Sentru Solidariedade Sosiál no Inkluzasaun, Agapito Assis Cardoso, esplika implementasaun programa asisténsia umanitária mak distribui ai-han ba família vulnerável no labarik abandonadu sira. Ba programa atendimentu violénsia bazeia ba jéneru mak halo akompañametu ba vítima kuaze na’in-haat no lori bá uma mahon no ba rede referál sira.

Ba asuntu defisiénsia nian mak distribui ai-han hamutuk ho parseiru sira no halo sensibilizasaun iha postu administrativu sira kona-ba direitu ema ho difisiénsia sira-nian. Ba programa bolsa da mãe kondisionál abranje ona benefisiáriu 3.212 husi postu hitu ho montante osan $325.140. Aleinde ne’e, programa bolsa da mãe jerasaun foun iha benefisiáriu 4.880 ho totál orsamentu $298.180.

Benefisiáriu ba programa bolsa da mãe jerasaun foun mak inan isin-rua no labarik sira ho tinan entre 0 no 3 mak simu pagamentu ba subsídiu asisténsia sosiál hodi hadi’a saúde no nutrisaun iha munisípiu Covalima. Prosesu pagamentu ba programa bolsa da mãe jerasaun foun fasilita liuhusi Mosan no Telin ka T-Pay.

Bolsa da mãe jerasaun foun mak programa transferénsia osan ne ebé estabelese bazeia ba Dekretu-Lei númeru 22/2021, loron 10 novembru. Programa ne’e hahú ona iha Ainaro, Bobonaro, no RAEOA iha tinan 2022 no iha Covalima, Liquiçá, Manatuto no Viqueque iha tinan 2023.

Subsídiu kada fulan ba inan-isin rua $15, labarik tinan 0-3 $20 no labarik ho moras króniku ka difisénsia.

To’o loron 31 agostu 2023 liubá, benefisiáriu bolsa da mãe jerasaun foun hamutuk 53.512 mak rejistradu, ne’ebé kompostu hosi inan isin-rua 9.601, labarik 43.413, labarik ho defisiénsia 198.

Hosi totál benefisiáriu ne’ebé rejistradu, Ministériu Solidaridade Sosiál no Inkluzaun (MSSI) aprova 51.326, kompostu hosi inan isin-rua 9.037, labarik 42.104, no labarik ho defisiénsia 185.

Relasiona ho Subsídiu Apoiu Kondisionál “Bolsa-da-mãe” mak fó tulun ho osan, ne’ebé mai hosi Orsamentu Jerál Estadu nian, ne’ebé hanaran kondisionál tanba ninia atribuisaun ne’e depende ba família sira-nian atividade sira, ho objetivu atu hamenus ki’ak, promove frekuénsia ensinu báziku obrigatóriu no asesu ba kuidadu saúde primáriu sira. Bolsa da mãe ida ne’e ho objetivu atu promove asesu ba edukasaun no saúde ba oan sira.

Tuir dadus MSSI, estudante sira-ne’ebé sai benefisiáriu ba programa bolsa da mãe kondisionál iha territóriu hamutuk 76.094 ho orsamentu millaun $4,6.

Notísia relevante: “Pagamentu Bolsa da Mãe Kondisionál sei konklui iha 20 dezembru”

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!