VIQUEQUE, 15 dezembru 2023 (TATOLI)—Diretór Servisu Edukasaun Viqueque, Domingos Brandão, informa, bazeia ba rezultadu ezame nasionál tinan 2023 hosi Ensinu Báziku, Sekundáriu no Tékniku Vokasionál, estudante munisípiu Viqueque na’in-3.398 pasa no na’in-10 la pasa.
“Númeru ne’e hosi Ensinu Báziku Sentrál (EBC, sigla portugés) 18 no Sekundáriu lima. Iha kinta (14/12) ne’e, ami distribui ona ba eskola sira hodi entrega ba estudante sira haree rezultadu ezame nasionál,” Domingos Brandão, informa, iha ninia knaar fatin, Beloi, sesta ne’e.
Tuir dadus, estudante EBC ne’ebé partisipa ezame nasionál hamutuk na’in-1.926, Sekundáriu kompostu hosi siénsia teknolojia na’in-775, siénsia sosiál umanidade na’in-587 no Tékniku Vokasionál na’in-110.
Notísia relevante : Servisu Edukasaun Viqueque identifika estudante sia la partisipa ezame nasionál
Enkuantu, estudante na’in-rua hosi Eskola CAFE Viqueque hetan klasifikasaun dahuluk ho valór 50, no klasifikasaun daruak ho valór 49 hosi no klasifikasaun datoluk ho valór 47 hosi EBC Lacluta.
Klasifikasaun dahuluk hosi Eskola Sekundáriu Jerál (ESJ) siénsia teknolojia iha estudante na’in-tolu hosi ESJ Daroi, ESJ Sabika Besi Kulit no ESJ St. António Lacluta, ho valór 58, klasifikasaun daruak hosi ESJ St. Estevão Viqueque Vila na’in-tolu no ESJ Sabika Besi Kulit na’in-ida.
Iha estudante ida hosi ESJ Uatucarbau siénsia sosiál umanidade ho klasifikasaun dahuluk ho valór 56, estudante na’in-rua hosi ESJ Sabika Besi Kulit Uatulari hetan klasifikasaun daruak ho valór 55, no estudante na’in-ida hosi ESJ Sabika Besi Kulit Uatulari hetan klasifikasaun datoluk ho valór 53.
Estudante na’in-ida hosi Ensinu Sekundáriu Teléniku Vokasionál (ESTV) Rabina Lacluta ho klasifikasaun dahuluk ho valór 152, estudante namin-ida hosi ESTV Cristal Viqueque Vila ho klasifikasaun daruak ho valór 135 ESTV no estudante ida hosi ESTV Kalo-Heda hetan klasifikasaun datoluk ho valór 134.
Jornalista : Vitorino Lopes da Costa
Editora : Julia Chatarina
