DILI, 15 dezembru 2023 (TATOLI) – Ministra Edukasaun, Dulce de Jesus, promete ba deputadu sira iha Parlamentu Nasionál katak sei rezolve problema manorin sira-nian, liuhusi programa bolsa kandidatu ba profesór rihun 3 ne’ebé sei implementa iha tinan oin.
“Atu hatete iha Parlamentu Nasionál ne’e katak bainhira ami implementa ona programa bolsa kandiatu ba ita-nian profesor rihun 3 iha tinan 2024, ami sei hakotu ona problema iha Ministériu Edukasaun ne’ebé maka ita-boot sira rona kona-ba profesór mate klamar, profesór kontratadu no profesór voluntáriu”, Dulce de Jesus afirma, ohin.
Pograma bolsa kandidatu ba profesór sira ne’e sei implementa tanba Dekretu-lei númeru 31/2023 kona-ba Estatutu Karreira Edukadór rasik fó dalan. Tanba ne’e, Ministériu Edukasaun (ME) sei halo prosesu rekrutamentu ida, maibé bazeia ba kuadru pesoál ne’ebé mak ME halo tiha ona.
Implementasaun kuadru pesoál ne’e rasik sei realiza iha próxima segunda-feira, liuhusi publikasaun iha Jornál Repúblika, nune’e enskola bázika hotu iha territóriu bele hatene didi’ak sira-nian kuadru pesoál.
Tuir Dulce de Jesus, baihira kuadru pesoal ne’e fó sai ona maka foin bele hatene iha eskola bázika sira ne’e eskola ne’ebe maka nia profesór barak liu no ida ne’ebe maka sei falta, nune’e ministériu bele foti desizaun imediata hodi halo fali transferénsia manorin husi eskola ne’ebe barak liu bá fali ida ne’ebé mak sei menus.
“Bainhira programa ida ne’e realiza ona maka ministériu foin loke fali vaga ba bolsa kandidatu profesór sira. Maibé, vaga ne’e sei loke ba públiku, ema hotu iha Timór laran ne’ebé iha interese hakarak sai profesór bele submete dokumentu hodi tuir teste, nune’e bele rejista iha bolsa kandidatu”, adianta.
Polítika ida ne’e ME halo atu responde ba númeru profesór idade reforma rihun 2-resin ne’ebé maka hein de’it tempu atu husik ona sira-nian profisaun. Nune’e, liuhusi bolsa kandidatu ne’e rasik sei substitui fali númeru reforma ne’ebé eziste ona.
“Maluk timoroan sira ne’ebé maka prienxe ona abilitasaun literária tuir estatutu karreira dosente mínimu baxarelatu bele bá rejista hodi tuir teste atu sai profesór”, apela.
Notísia relevante: ME promete halo rekrutamentu ba manorin sira ne’ebé kualifikadu
Jornalista: Tomé Amado
Editora: Maria Auxiliadora
