DILI, 15 dezembru 2023 (TATOLI)—Ministériu Komérsiu no Indústria (MKI) hamutuk ho Autoridade Inspesaun no Fiskalilizasaun Atividade Ekonómiku, Sanitária no Alimentár, Institutu Públiku (AIFAESA,I.P) sei kontinua monitoriza ai-han kontamina formalin.
“Relasiona ho peskizadór hosi Institutu Politékniku Betanu (IPB) ne’ebé deskobre formalin iha na’an importasaun, ha’u hanoin ministériu no AIFAESA, I.P nia serbisu mak oinsá kontinua halo monitorizasaun ba produtu sira ne’e, maibé ita iha limitasaun ekipamentu, entaun ida-ne’e mak sai ita-nia dezafiu,” Diretór Jerál Indústria, Carlos Ximenes Lopes, hateten, ba Agência Tatoli, iha salaun Ministériu Negósiu Estranjeiru no Kooperasaun (MNEK), sesta ne’e.
Notísia relevante : IQTL apresia serbisu IPB deskobre formalin iha na’an importasaun sira
Nia konsidera deskobrementu hosi IPB ne’e bele ajuda Governu nia serbisu ba oin no halo esforsu di’ak liután, liu-liu AIFAESA,I.P ne’ebé nu’udar kontrolu ba kualidade ai-han ninian.
“dezafiu sira ne’ebé ita hasoru maka ba laboratóriu, ita sei halo esforsu no espera ho orsamentu 2024 AIFAESA,I.P bele iha ona laboratóriu hodi atende ba situasaun sira ne’e, tanba formalin ne’e mós fó ameasa ba ema-nia saúde” nia tenik:
Jornalista : Arminda Fonseca
Editora : Julia Chatarina
