PN aprova Dotasaun Jerál Estadu $227.711.548 ho votu a-favór 42

DILI, 15 dezembru 2023 (TATOLI)—Parlamentu Nasionál (PN), sesta-ne’e, aprova proposta Orsamentu Jerál Estadu (OJE) 2024 prevista ba Dotasaun Jerál Estadu iha proposta $227.711.548 ho votu a-vafór 42, kontra rua (2) no abstensaun 21.
Notísia Relevante: PN aprova proposta OJE 2024 iha faze jeneralidade ho votu a-favór 43
“Nune’e, orsamentu Dotasaun Jerál Estadu aprovadu,” Prezidente Parlamentu Nasionál, Maria Fernanda Lay, hateten liuhosi diskusaun no votasaun ba proposta OJE 2024 faze espesialidade ba loron daruak iha sala plenária PN.
Dotasaun Jerál Estadu iha proposta OJE 2024 prevee $227.711.548 hodi aloka ba saláriu vensimentu $21.696.380, bens no serbisu $73.260.218, transferénsia públika $131.616.950, kapitál menór $138.000 no kapitál dezenvolvimentu $1.000.000.
Hosi orsamentu ne’e aloka ba programa jestaun finansa públika $33.103.125, programa kontinjénsia $44.900.000, programa asesu justisa $1.550.000, programa polítika externa Timor-Leste $9.918.173, programa funsionamentu no dezenvolvimentu instituisionál $20.600.996, programa inkluzsaun sosiál $112.639.254, programa investimentu no diversifikasaun ekonómika $5.000.000.
PN mós aprova proposta OJE 2024 ba Ministériu Finansa $22.645.532 ho votu a-favór 44, kontra rua (2) no abstensaun 12.
Orsamentu Ministériu Finansa $22.645.532 hodi aloka ba saláriu vensimentu $10.963.040, bens no serbisu $9.204.263, transferénsia públika laiha, kapitál menór $1.100.000, kapitál dezenvolvimentu $1.378.229.
Tuir livru proposta-lei OJE 2024 planu asaun anuál hosi Ministériu Finansa fó prioridade ba Programa jestaun finansa públika ho nia sub-programa neen no atividade 37, no programa funsionamentu no dezenvolvimentu instituisionál ho sub-programa rua no atividade 17.
Jornalista : Nelson de Sousa
Editór : Cancio Ximenes

