VIQUEQUE, 15 dezembru 2023 (TATOLI)—Implementasaun programa merenda eskolár iha munisípiu Viqueque iha loron efetivu 135 tama ona iha faze finál.
“Daudaun ne’e Ekipa Jestaun Programa (EJP) hahú prepara filafali relatóriu ezekusaun orsamentu alokadu atu aprezenta ba munisípiu Viqueque,” Diretór Servisu Edukasaun Viqueque, Domingos Brandão, relata ba Agência Tatoli, iha ninia knaar fatin, Beloi, sesta ne’e.
Diretór dehan, durante implementasaun programa, ninia vantajen maka estudante sira bele partisipa másimu iha eskola no partisipa ensinu prezensiál tanba bele motiva estudante liuhosi ai-han ne’ebé konsumu.
Desvantajen maka profesór no inan amn hosi estudante sira haree malu ladún di’ak tanba sira deskofia gupu EJP ladún utiliza osan ho di’ak tanba EJP laiha saláriu, nune’e sira tenke foti fali osan balun hosi programa ne’e.
Notísia relevante : Kondisaun kuziña eskola sai problema ba implementasaun merenda eskolár iha Viqueque
Programa ne’e implementa hosi EJP no akompaña hosi profesór iha kada eskola.
“Bainhira mosu problema ruma relasiona implementasaun programa, ami sempre tun direta hodi rezolve, nune’e ba implementasaun programa merende eskolár iha munisípiu Viqeuque ba tinan ida-ne’e la’o ho di’ak,” nia akresenta.
Aleinde ne’e, Servisu Edukasaun, Servisu Saúde Viqueque no Administrasaun Viqueqeu liuhosi Diresaun Fiskalizasaun halo knaar durante implementasaun programa.
“Maibé ami haree durante implementasaun iha loron efetivu, ami ho saúde de’it maka akompaña. Durante ne’e Diresaun Fiskalizasaun hosi munisípiu ladún akompaña fiskalizasaun,” nia akresenta.
Ekipa responsável sira maioria uza produtu lokál tanba iha kritéria hateten la uza produtu importasaun.
“Dalaruma falta produtu lokál iha implementasaun, ekipa sira uza filafali supermi no ayam potong,” nia tenik.
Orsamentu ba implementasaun programa merende eskolár tinan 2023 purvolta millaun $1-resin, ne’ebé jere hosi EJP no Servisu Edukasaun Viqueque.
Programa nasionál ne’e, ho verba estudante ida han $0,42 kada loron, ne’ebé fahe ba sosa ahi sunu, pulsa eletrisidade, bikan kanuru no seluk.
Tuir dadus, Ensinu Báziku Sentrál públiku iha munisípiu Viqueque hamutuk 18, Pre-Eskolár 35, Eskola Filiál 77 no Ensinu Privadu ualu mak sai benifísiariu ba programa merenda eskolár.
“Implementasaun programa merenda eskolár ba tinan 2024 ami tetu ona orsamentu nafatin hanesan tinan 2023, maibé ami hakarak hadi’a parte fiskalizasaun tanba durante ne’e ladún la’o, tanba ne’e ami sei hadi’a grupu EJP balun no hadi’a mós fatin tein sira-ne’ebé durante ne’e grupu sira uza hodi tein, tanba ami haree fatin kuziña barak maka ho kondisaun ladi’ak,” nia tenik.
Jornalista : Vitorino Lopes da Costa
Editora : Julia Chatarina
