iklan

NASIONÁL, EKONOMIA, HEADLINE

TAF2+ aprezenta importánsia rejime orijen ba Timor-Leste

TAF2+ aprezenta importánsia rejime orijen ba Timor-Leste

Tékniku hosi Ministériu Komérsiu Indústria no Apoiu Tékniku hosi Estadu Reinu Unidu hasai foto hamutuk hafoin aprezentadaun kona-ba implementasaun regra orijen karga, iha salaun Institutu Diplomátiku, MNEK, Praia dos Coqueiros, sesta (15/12/2023). Imajen Tatoli/Egas Cristóvão

DILI, 15 dezembru 2023 (TATOLI)Governu Reinu Unidu liuhosi Trade and Investment Advocacy Fund 2 Plus (TAF2+), sesta ne’e, aprezenta importánia Rules of Origin (ROO) ka rejime orijen karga ba prosesu adezaun Timor-Leste  ba Asosiasaun Nasaun Sudeste Aziátiku (ASEAN) no Organizasaun Mundiál Komérsiu (OMK).

“Ita haree Timor-Leste halo ona progresu ekstraoronáriu tebes ba iha prosesu adezaun OMK nian. Paralelamente Timor-Leste mós hakarak tama iha ASEAN Ekonómia Komunidade (AEC, sigla portugés), nune’e TAF2+ nia objetivu mak fó asisténsia téknika no apoia dezenvolvimentu kapasidade ba Governu hodi kontinua iha adezaun ba AEC nian,” Reprezentante Governu Britániku, Adnan Khan, hateten, iha salaun Institutu Diplomátiku, Ministériu Negósiu Estranjeiru no Kooperasaun (MNEK), iha Praia dos Coqueiros.

Notísia relevante : PM Xanana desloka ohin bá Japaun partisipa simeira ASEAN – Japaun

Timor-Leste sei sai membru plenu ASEAN tuir tempu determinadu ona iha tinan 2025, ne’ebé daudaun ne’e presiza apoiu tékniku.

Nia dehan, apoiu ne’ebé Reinu Unidu halo iha área barak maibé daudaun ne’e presiza liu mak iha área sanitasaun no fitosaniáriu (SPS, sigla inglés) inklui tékniku komérsiu (TBT, sigla inglés), ne’ebé projetu ne’e foku ba rejime orijen karga  no dezenvolve kuadru lejislativu ne’ebé koordenadu ho kapítulu III kona-ba regra orijen ‘Merkadoria hosi Akordu Komersiál Bens ASEAN (ATIGA).

TAF2+ aprezenta mós konsultadór internasionál na’in-tolu ne’ebé sei fó asisténsia téknika no apoiu dezenvolvimentu kapasidade mak hanesan entidade Governu, kámara komérsiu, asosiasaun indústria sira no seluk tan.

TAF2+ nia objetivu mak atu haree lei ROO nian ne’ebé iha relasaun rekejitu hosi OMK no ATIGA, hodi prepara ba rekomendasaun no lala’ok kontinuasaun ne’ebé iha relasaun ho lei ne’e hodi ajuda no kumpre rekezitu hosi asosiasaun rejionál.

“Apoiu TAF2+ ba Governu Timor-Leste ne’e rasik sei ramata iha marsu 2024, ita espera to’o loron ne’e ita bele fó apoiu ona atu iha ROO ne’ebé espesífiku liutan,” nia tenik.

Iha fatin hanesan, Diretór Jerál Indústria, Carlos Ximene Lopes, hateten, Timor-Leste iha ROO rasik maibé jerál liu, la ko’alia espesifikamente, entaun la kumpre roteiru adezaun ba ASEAN nian.

“Ita presiza atualiza fali maibé ha’u hanoin to’o iha ne’ebá instituisaun relevante sira hamutuk halo diskusaun nune’e asisténsia téknika ne’ebé ita hetan hosi ita-nia komérsiu ne’e bele mos atinje ona nível rejionál no internasionál.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!