iklan

EDUKASAUN, COVALIMA, HEADLINE

Eskola pre-eskolár São Francisco Asisi Beco gradua estudante

Eskola pre-eskolár São Francisco Asisi  Beco  gradua estudante

Estudante Eskola Ensinu Pre-eskolár São Francisco Asisi Beco,simu graduasaun, sábadu (16/12/2023). Imajen Tatoli/Celestina Teles

COVALIMA, 16 dezembru 2023 (TATOLI)Eskola Ensinu Pre-eskolár São Francisco Asisi, iha suku Beco, postu administrativu Suai, munisípiu Covalima, sábadu ne’e, gradua estudante na’in-15 hosi tinan letivu 2023.

Koordenadora Eskola Pre-eskolár São Francisco Asisi hosi Franciscano Canosa Jesuina Maria (FCJM), Madre Antónia de Jesus, apresia ba parte hotu nia apoia ba estudante sira hodi iha vontade di’ak atu apreende alfabetu, kanta, dansa modernu, tradisionál no seluk tan.

“ Ha’u hato’o agradese ba inan aman ne’ebé fó sira-nia apoia mai ami, husik sira-nia oan hodi apreende hamutuk ho ami iha eskola pre-eskolár Beco. Ohin sira finaliza ona estudu no kontinua eskola iha eskola ensinu báziku,” Madre Antónia de Jesus, informa ba Agência Tatoli.

Notísia relevante : Estudante na’in-25 hosi ensinu pre-eskolár BCA simu graduasaun 

Antes ne’e, estudante pre-eskolár iha suku Beco hamutuk 41, ikus mai menus to’o de’it estudante 26, iha  na’in-15 mak ohin simu gradusaun no na’in-11 seidauk simu no sei kontinua estudu.

Eskola pre-eskolár nia profesór hamutuk lima, kompostu hosi madre na’in-tolu, manorin kontratadu na’in-ida no estajiáriu na’in-ida.

Pároku Ave Maria Suai, Sebastião Eugénio Correia, esplika, estudante pre-eskolár ne’ebé simu graduasaun durante tinan-ida sira apreende, hatudu ona nia rezultadu no ohin halo aprezentasaun halo inan aman sira kontente.

“Ita haree sira-nia aprezentasaun puizia, dansa modernu no seluk hatudu vontade no hakarak atu aprende, tanba dala barak ita maka la investe iha edukasaun,” nia akresenta.

Ho nune’e, Padre Pároku ne’e husu ba estudante nia inan aman atu investe iha setór edukasaun no labele  abandona labarik sira, nune’e to’o ikus  la hetan formasaun di’ak.

Reprezentante inan aman estudante, Manuel Henrique Barreto,  kontente ho rezultadu ne’ebé estudante sira hatudu

“Haree ba sira-nia kualidade hanesan estudante sira eskola iha ensinu báziku. Ami kontente ho sira-nia rezultadu tanba ami nia-oan sira ho idade ne’ebé kiik, maibé sira dekór ona hinu nasionál. Ita hatene funsionáriu barak maka la dekór hinu nasionál,” nia dehan.

Iha serimónia graduasaun ne’e, Administradór postu administrativu Suai,  Lusinho do rego, muda fita iha estudante sira-nia xapeo, entrega  sertifikadu no hasai fotografia hamutuk ho estudante ida-idak ne’ebé simu graduasaun.

Jornalista     : Celestina Teles

Editora          : Julia Chatarina

iklan
iklan

Leave a Reply

iklan
error: Content is protected !!